წესები და კითხვები მართვის მოწმობის პრაქტიკულ გამოცდაზე

მომსახურების სააგენტოს უფროსის მოადგილემ იმედა მაკასარაშვილმა „იმედთან“ საუბარში ავტომობილის ტექნიკურ გამართულობასთან დაკავშირებით გამოცდების ჩაბარების შესახებ ისაუბრა და განმარტა, რომ აქ საუბარი არ არის ტექნიკური დეტალებისა და მახასიათებლების გარჩევაზე.

მაკასარაშვილის განმარტებით, აღნიშნული ცვლილება განპირობებულია საქართველოს და ევროკავშირს შორის ასოცირების ხელშეკრულებიდან გამომდინარე.

მისივე თქმით, კითხვები ორი სახის არის და გამოცდაზე მისულ პირს შეუძლია მესამე პირის დახმარებაც გამოიყენოს.

„რა თქმა უნდა, ჩვენ არ მოვითხოვთ ტექნიკური დეტალების და ტექნიკური მახასიათებლების გარჩევას გამოცდაზე. პირველ რიგში, მინდა აღვნიშნო რომ აღნიშნული ცვლილება განპირობებულია საქართველოს და ევროკავშირს შორის ასოცირების ხელშეკრულებიდან გამომდინარე, რომელსაც ეს ხელშეკრულება ითვალისწინებს. ჩვენ ვალდებული ვართ, დირექტივის მოთხოვნები გავითვალისწინოთ. ძალიან მარტივი კითხვებია, მაგალითად კითხვა გულისხმობს შუქმაჩვენებლების გამართულობას.

კითხვები არის ორი სახის და შეგიძლიათ ზეპირად უპასუხოთ ან კანდიდატს შეუძლია ვიზუალურად აჩვენოს და ახსნას თუ როგორ უნდა შეამოწმოს ესა თუ ის დეტალი. მაგალითად, როდესაც გამომცდელი კანდიდატს ეკითხება –  როგორ უნდა შეამოწმოს საავარიო შუქსიგნალიზაცია, ამ შემთხვევაში უნდა ჩავრთოთ საავარიო შუქსიგნალიზაცია, ასევე, მანქანიდან გამოსვლით შეგიძლიათ შეხედოთ სატრანსპორტო საშუალებას სინქრონულად მუშაობს თუ არა.

ასევე, კანდიდატს შეუძლია აღნიშნულ პროცესში მესამე პირის დახმარება გამოიყენოს, მაგალითად გამომცდელს სთხოვო,ს რომ ვიზუალურად შეხედოს. მაგალითად კითხვები იქნება, როგორ მოწმდება ძრავში ზეთის დონე ან სად მდებარეობს მინავრეცხის რეზერვუარი. 

რაც შეეხება B კატეგორიას, სულ აღნიშნულია 20 კითხვა. 20-ვე კითხვა მოცემულია შინაგან საქმეთა მინისტრის ბრძანებაში, რომლითაც რეგულირდება პრაქტიკული გამოცდის მეორე ეტაპის მიღების წესები. შესაბამისად, 20-ვე კითხვას თან სდევს თავისი პასუხები, რომელიც იგივე ბრძანებაშია მოცემული.

შესაბამისად, ნებისმიერი კანდიდატი, რომელიც გამოცდაზე მოდის ბრძანებაში შეუძლია გაეცნოს იმ სავარაუდო კითხვებს, რომელსაც გამომცდელი დაუსვამს 1-ელი სექტემბრიდან. არჩევითი იქნება და მოძრაობის დაწყებამდე ორ კითხვას დაუსვამს და უარყოფითი პასუხი ფასდება როგორც მსუბუქი შეცდომა, ერთი კითხვა ერთი მსუბუქი შეცდომაა. თუ კანდიდატი დადებითად უპასუხებს, რა თქმა უნდა, გააგრძელებს მოძრაობს“, – აცხადებს მაკასარაშვილი.

აღსანიშნავია, რომ ეს ცვლილება 2023 წლის 1-ელი სექტემბრიდან შევა ძალაში.