გარკვეულ ფართობებზე თხილის ხმობის მიუხედავად, რამაც საპროგნოზო მოსავლიანობა შეამცირა, წელს საქართველოში, რაოდენობრივად გასულ წელთან შედარებით, თხილის მოსავალი დაახლოებით 10%-ით გაიზარდა. ფერმერების ნაწილი, რომლებმაც მოსავალი უკვე დააბინავეს, რეალიზაციას არ ჩქარობენ. მიზეზი სექტემბრის მეორე ნახევარში, საერთაშორისო ბაზარზე პროდუქციის დეფიციტიდან გამომდინარე, თხილის კიდევ უფრო გაძვირების მოლოდინია.
თხილზე ფასის ზრდა მთავარ მწარმოებელ ქვეყნებში პროდუქციაზე წარმოქმნილმა დეფიციტმა გამოიწვია. ბაქტერიული დაავადების გამო თხილის ბაღების 40% განადგურდა თურქეთში და ასევე იმავე მიზეზით მოსავლიანობა შემცირებულია იტალიაშიც. თუ ევროპაში გასულ წელს თხილის სარეალიზაციო ფასი 7 ევროს ფარგლებში იყო, წელს თხილის ღირებულება 10-10,5 ევროა.
“თურქეთი არის თხილის პირველი მწარმოებელი. წელს თურქეთმა გამოაცხადა დაახლოებით 40%-ით ნაკლები მოსავალი, ვიდრე მათ ჰქონდათ შარშან. დაახლოებით 40-50%-იანი ვარდნა აქვთ მოსავლის რაოდენობაში იტალიასაც, რაც ფასებზე პოზიტიურად აისახა. წელს სეზონის დასაწყისში ფასები დაახლოებით 25-30%-ით არის გაზრდილი, ვიდრე შარშან, რაც ფერმერებისთვის კარგი სიახლეა.
ადგილობრივ ბაზარზეც, შარშან საშუალო ხარისხის გასატეხი თხილის ფასი თუ ფერმერისთვის 7 ლარის ფარგლებში იყო, წელს 9 ლარია.
ვფიქრობ, რომ ფასის ზრდის ტენდენცია შენარჩუნდება მიუხედავად იმისა, რომ ევროპული ქვეყნები შესყიდვებისგან თავის შეკავებას და ცდილობენ ბაზრის დასტაბილურებას ცდილობენ, იქიდან გამომდინარე, რომ ფასი, რომელსაც მწარმოებლები სთავაზობენ ბაზარს, საკმაოდ მაღალია და შესყიდვები ინტენსიურად არ მიმდინარეობს. ვფიქრობ, რომ 15 სექტემბრიდან უკვე მოუწევთ შესყიდვა და გაზრდილი ფასი შენარჩუნდება. ასეთია ჩვენი მოლოდინი”, – აცხადებს bm.ge-სთან თორნიკე ლათათია, “ნათს ინქორფორეითიდის” დირექტორი.
ქართული თხილის ექსპორტი უფრო აქტიურად, სავარაუდოდ, მომდევნო თვეებში განხორციელდება, მას შემდეგ, რაც ქვეყანაში თხილის მოსავლის აღება დასრულდება, თუმცა მიმდინარე წლის 7 თვის სტატისტიკის მიხედვით, ზრდა ექსპორტში უკვე თვალსაჩინოა. წელს იანვარ-ივლისში საექსპორტო ბაზრებზე 56 მილიონ დოლარამდე პროდუქცია გაიყიდა, 20 მილიონი დოლარით მეტი, ვიდრე შარშან.
საანგარიშო პერიოდში ქართული თხილისთვის მთავარი გასაღების ბაზრები ესპანეთი, იტალია, საფრანგეთი, გერმანია და ისრაელი არიან.
www.bm.ge
Loading ...