წელს თხილის მოსავალი არა – 50 ათასი ტონა, არამედ 40-42 ათასი ტონის ფარგლებში იქნება – ასოციაცია

თხილის მწარმოებელთა და ექსპორტიორთა ასოციაციის ინფორმაციით, წელს სექტორი 50 000 ტონა თხილის მოსავალს პროგნოზირებდა, თუმცა კლიმატური პირობებიდან გამომდინარე, ფერმერების მოსავალი, დაახლოებით, 40-42 ტონის ფარგლებში იქნება.

მიუხედავად იმისა, რომ წელს მოსავლიანობა შემცირდა, საკმაოდ მაღალია ფასი თხილზე, რაც ამ კულტურის ერთ-ერთ მთავარ მწარმოებელ ქვეყანაში თურქეთში შექმნილი დეფიციტით არის განპირობებული.

მერაბ ჭითანავას თქმით, მაღალი ხარისხის გაუტეხავი თხილის ღირებულება დღეს ადგილობრივ ბაზარზე 10-13 ლარის ფარგლებშია, რაც გასულ წლებთან შედარებით გაორმაგებული მოცულობაა. თხილზე მაღალია ფასი საექსპორტო ბაზრებზეც და 12-დან 14 ევრომდე მერყეობს, მაშინ როცა გასულ წელს ეს მაჩვენებელი 7-8,5 ევროს ფარგლებში იყო.

„თხილის მოსავლის აღება დასრულებულია. სეზონი მოსავლის უფრო დაბალი რაოდენობით დასრულდა, ვიდრე ველოდით, რადგან მოსავლის აღებამ გადაიწია, დაახლოებით, ორი კვირით, რასაც დაემთხვა წვიმები. მოსავლის რაოდენობა მნიშვნელოვნად განსაკუთრებით დასავლეთ საქართველოში შემცირდა. ვფიქრობ, მოსალოდნელი 50 000 ტონის ნაცვლად, მოსავალი, დაახლოებით, 40–42 000 ტონა იქნება.

მიუხედავად მცირე რაოდენობისა, წელს თურქეთში მცირე მოსავლიანობის გამო, ძალიან მაღალია ხარისხიან თხილზე ფასი. ის ფერმერები, ვინც ჩაატარეს წამლობები და მიიღეს ხარისხიანი პროდუქცია, იღებენ ძალიან მაღალ ფასებს თხილზე, უპრეცედენტოდ მაღალს. ფასი გაუტეხელ თხილზე დაფიქსირდა 12–13 ლარი კილოგრამზე. ახლა შედარებით ცოტა დაიწია თხილის ღირებულებამ, თუმცა შარშანდელთან შედარებით მაინც ძალიან მაღალი ფასებია, რასაც ვერ ვიტყვი იმ თხილზე, რომელიც დაბალი ხარისხისაა”, – განაცხადა მერაბ ჭითანავამ BMG-სთან და ბაზრის ტენდენციები და ქართული თხილის ფასზე მოქმედი ფაქტორებიც მიმოხილა.

“თურქეთის მოსავლის რაოდენობის სიმცირემ გამოიწვია ფასის ძალიან მკვეთრი ზრდა სეზონის დასაწყისში. ახლა ფასმა საკმაოდ დაიწია, რადგან მსოფლიოში უმსხვილესი თხილის შემსყიდველი კომპანია „ფერერო“ არ შევიდა თურქეთის ბაზარზე და არ დააფიქსირა მოსალოდნელი მაღალი ფასები და ნელ-ნელა ბაზარი ქვემოთ ჩამოდის, თუმცა საქართველოში „ფერერო“ აგრძელებს პრემიუმ ხარისხის თხილის შესყიდვას ძალიან კარგ ფასში. ჩვენი ბაზრისთვის ეს ძალიან ხელსაყრელი პოზიციაა.

ასევე კარგი ტენდენციაა იმ კუთხით, რომ თურქეთის ბაზრის ტურბულენტურობამ გამოიწვია ევროპაში არსებული სხვა კლიენტების, რომლებიც ტრადიციულად იყვნენ თურქული და იტალიური თხილის შემსყიდველები, ფოკუსის გადმონაცვლება საქართველოზე და აზერბაიჯანზე. წელს გვაქვს უნიკალური შანსი, რომ შევიდეთ ისეთი ჯგუფების პორტფელში, რომლებთანაც ადრე ძალიან ძნელი იყო პოზიციონირება. ამ კუთხით საკმაოდ პოზიტიური სეზონი გვაქვს.

საქართველო წელს ძალიან მაღალ ფასებში გაყიდის თავის პროდუქციას. ალბათ, მომავალ წელსაც ეს ტენდენცია მეტ-ნაკლებად შენარჩუნდება და არ იქნება დაბალი ფასები. შესაბამისად, სასიხარულოა ის, რომ ფერმერები, რომლებმაც კარგად მოუარეს თავიანთ ბაღებს და მიიღეს ხარისხიანი თხილი, იღებენ უპრეცედენტოდ მაღალ შემოსავალს”, – აცხადებს bm.ge-სთან თხილის მწარმოებელთა ასოციაციის აღმასრულებელი საბჭოს თავმჯდომარე მერაბ ჭითანავა.

www.bm.ge