ძლიერმა ქარმა რეგიონებში საცხოვრებელი სახლები და ელექტროგადამცემი ხაზები დააზიანა (ფოტოები)

ძლიერმა ქარმა პრობლემები შექმნა სამეგრელოში ფოთსა და ქუთაისში საცხოვრებელი სახლები დააზიანა,ასევე მოსახლეობას ელექტროენერგია არ მიეწოდება.

„რეგიონში ელექტროენერგიის მასშტაბური წყვეტა არ მომხდარა, თუმცა ძლიერი ქარის გამო ნაწილობრივ დაზიანდა ელექტროგადამცემი ხაზები, რის გამოც აბონენტების ნაწილს შეზღუდვით მიეწოდება ელექტროენერგია. კომპანიის ტექნიკური ბრიგადები ოპერატიულად აწარმოებენ აღდგენით სამუშაოებს და აბონენტებს ელექტროერგიის მიწოდება ეტაპობრივად აღუდგებათ“, – განაცხადეს „ენერგოპრო ჯორჯიას“ სამეგრელოს რეგიონულ ოფისში.

გარდა ამისა, წაქცეულია მრავალწლოვანი ხეები. მიმდინარეობს გაწმენდითი სამუშაოები.

ასევე, ზუგდიდის მუნიციპალიტეტის სოფლებში, ცაიშსა და ცაცხვში ქარმა კერძო საცხოვრებელ სახლებს სახურავები გადახადა.

ძლიერმა ქარმა ასევე პრობლემები შექმნა ქუთაისშიც. სტიქიის გამო რამდენიმე ხე წაიქცა და სახლის სახურავები დაზიანდა.

ქალაქის მერის, იოსებ ხახალეიშვილის განცხადებით, მერიაში ამოქმედებულია ცხელი ხაზი, ხოლო ქალაქში არსებულ ყველა ადმინისტრაციულ ერთეულში მობილიზებულია ჯგუფები, რათა საჭიროების შემთხვევაში, მოქალაქეებს დახმარება გაუწიონ.

პარალელურად მიმდინარეობს ზარალის აღწერა.