ამ წუთებში ათეულობით ავტომანქანა არის გაჩერებული ვაზიანი-გომბორი-თელავის საავტომობილო გზაზე. მიზეზი ძლიერი თოვა და რთული მეტეოროლოგიური პირობებია. არსებული ვითარების გამო შს სამინისტროს საპატრულო პოლიციის დეპარტამენტმა ავტოტრანსპორტის მოძრაობა ნაწილობრივ შეზღუდა.
როგორც რადიო თავისუფლებას შს სამინისტროდან აცნობეს, გზის აღნიშნულ მონაკვეთზე მოძრაობა ერთი წამყვანი ხიდის მქონე ავტომანქანებისთვის დაშვებულია მხოლოდ ზამთრის საბურავებითა და მოცურების საწინააღმდეგო ჯაჭვების გამოყენებით. ორი და მეტი წამყვანი ხიდის მქონე ავტოტრანსპორტისთვის გადაადგილება ნებადართულია მხოლოდ ზამთრის საბურავებით.
„ამავე გზაზე აკრძალულია მისაბმელიანი და ნახევარმისაბმელიანი ავტოტრანსპორტის მოძრაობა. საპატრულო პოლიციის თანამშრომლები ვაზიანი-გომბორი-თელავის საავტომობილო გზაზე ავტოტრანსპორტის უსაფრთხოდ გადაადგილებას არეგულირებენ და მძღოლებს გზაზე არსებული მდგომარეობის შესახებ ადგილზე აწვდიან ინფორმაციას”, – განაცხადეს შს სამინისტროს პრესსამსახურში.
www.radiotavisupleba.ge
Loading ...
