ძალოსანი შოთა მიშველიძე ევროპის ჩემპიონატზე ვერცხლის მედალს დაეუფლა

საქართველოს ძალოსანთა ნაკრებმა მოსკოვში მიმდინარე ევროპის ჩემპიონატის პირველსავე დღეს მედალი მოიპოვა. 61 კილოგრამ წონით კატეგორიაში, შოთა მიშველიძემ ორჭიდის ჯამში 290 კილოგრამი მოაგროვა და მეორე საპრიზო ადგილი დაიკავა. პირველ მოძრაობაში – ატაცში მიშველიძემ სამი ცდიდან ორი გამოიყენა და 135 კილოგრამით მცირე ვერცხლის მედალს დაეუფლა. მეორე მოძრაობაში – აკვრაში კი, 155 კილოგრამს და მეშვიდე ადგილს დასჯერდა.

61 კილოგრამ წონით კატეგორიაში მიშველიძის გარდა, საქართველოს სახელით კონკურენციაში რამინ შამილიშვილიც ჩაება და ორჭიდის ჯამში მოგროვებული 279 (124+155) კილოგრამით მერვე ადგილი დაიკავა. დღესვე, ევროპის ჩემპიონ-პრიზიორები 55 კილოგრამშიც გამოვლინდნენ. ფიცარნაგზე საქართველოს ნაკრების წევრი გიორგი დოკვაძე გავიდა და მეშვიდე ადგილი დაიკავა, 229 (105+124) კილოგრამით.

ევროპის ჩემპიონატი 11 აპრილის ჩათვლით გაგრძელდება და საქართველოს სახელით მედლისთვის ბრძოლაში კიდევ ცხრა ძალოსანი ჩაერთვება: გოგა ჩხეიძე (67 კგ), კახი ასანიძე (73 კგ), რევაზ დავითაძე (89 კგ), ანტონ პლესნოი (96 კგ), ირაკლი ჩხეიძე (102), ლაშა ტალახაძე, ირაკლი თურმანიძე (ორივე +109 კგ), ნათია გადელია (81 კგ) და ანასტასია გოტფრიდი (87 კგ).