ემიგრაციაში ყოფნის მრავალწლიანი ისტორიის მიუხედავად, გურული ემიგრანტები ამერიკაში წელს, 25 სექტემბერს, ერთად პირველად შეიკრიბნენ. შეკრებას, რომელიც პენსილვანიის შტატში, პოკონოში, წმინდა მეფე დავით აღმაშენებლის სახელობის ტაძრის ეზოში შედგა, 70 გურული დაესწრო. ამ დღეს არ აკლდა ემოცია, სითბო და ნოსტალგია, რომელიც ემიგრაციის და ემიგრანტების თანმდევი მდგომარეობაა. გურულების შეკრება დალოცა ჩრდილოთ ამერიკის ეპარქიის ეპისკოპოსმა, მეუფე საბამ. რომელმაც ღონისძიების მთავარი მიზანი და მიზეზი გაახმოვანა. შეკრების იდეის ავტორი და ამ ღონისძიების დამგეგმავი გიორგი ვასაძე იყო, რომელიც სულ ორი წელია ემიგრაციაშია და გურულების შეხვედრას ამერიკაში ჩასვლის დღიდან აანონსებდა. გიორგის იდეას მხარი სტაჟიანმა ემიგრანტმა , წარმოშობით ჩოხატაურელმა მარინა ჯიქიამ აუბა. ოკეანის გადაღმა მყოფი გურულები გვპირდებიან, რომ ამიერიდან მათ შეხვედრებს ტრადიციული სახე მიეცემა და იგი ყოველწლიურად გაიმართება.
“გურიაTV”-ის შეკრების ამსახველი ვრცელი სიუჟეტი, ჩვენმა კოლეგამ, ჟურნალისტმა მაია გიორგაძემ მოგვაწოდა, რომელიც მომავალშიც ითანამშრომლებს ჩვენთან და მსგავს სიუჟეტებს მოგვაწვდის.
Loading ...
