“ძალადობა იწვევს ძალადობას” – შალვა პაპუაშვილი ძალადობის ფაქტებზე

შალვა პაპუაშვილი ძალადობის კულტივირებაზე საუბრობს, თუმცა “ქართული ოცნების” პასუხისმგებლობას ვერ ხედავს. ბოლო დროს გახშირებულ თავდასხმებში პაპუაშვილი ისევ მსხვერპლებს ადანაშაულებს. მიშა მშვილდაძეზე მომხდარ თავდასხმასთან დაკავშირებით დასმული შეკითხვის პასუხად, პაპუაშვილი ამბობს, რომ აგრესიული რიტორიკით, ვერბალურად ხდება ძალადობის წახალისება:

“ჩვენ უკვე დიდი ხანია ვაკვირდებით ძალადობის კულტივირებას ქართულ საზოგადოებაში, ხდება ძალადობის კულტივირება, მისი წაქეზება, მათ შორის, გვახსოვს რამდენიმე თვის წინ, პარლამენტის გარშემო, ადამიანმა მოლოტოვის კოქტეილი ესროლა პოლიციელს და ცოცხლად წვავდა და დღემდე ემპათიით საუბრობენ ამ მოვლენაზე და ამით ახალისებენ ძალაობას. მე სხვა დროსაც მითქვამს, რომ ძალადობა იწვევს ძალადობას და საქმეც ეს არის, რომ ძალადობის წახალისებას, კულტვირებას, იმის საუბარს, რომ ეს არის გამოხატვის თავისუფლება და ა.შ. ამით იწყება, ვერბალური ძალადობით ხდება აგრესიის დაგროვება, შემდეგ გადადის ფიზიკურ ძალადობაში.” ამბობს პაპუაშვილი.

პარლამენტის თავმჯდომარეს მაგალითად მოჰყავს “გირჩი-მეტი თავისუფლების” ახალგაზრდული ბანაკები, რომელიც ასევე გახდა რამდენიმე კვირის წინ ხელისუფლების ორკების სამიზნე:

“არამხოლოდ წახალისება, დაფინანსება ხდება ძალადობის იდეისა. ვნახეთ “გირჩი მეტი თავისუფლების” შემთხვევაში, სემინარებზე ძალადობრივ რევოლუციებზე როგორაა საუბარი, იარაღის აწყობა-დაშლა როგორ ხდება და ეს ფინანსდება ევროპული და ამერიკული ფონდების მიერ” ამბობს პაპუაშვილი.