ცხინვალის რეგიონში დაჭრილი ბავშვი სამკურნალოდ თბილისში გადმოიყვანეს

ცხინვალის რეგიონში დაჭრილი 10 წლის ბავშვი სამკურნალოდ თბილისში გადმოიყვანეს. ამის შესახებ „ეხო კავკაზა“ იუწყება.

დაჭრილი ბავშვის გადმოყვანა წითელი ჯვრის საერთაშორისო კომიტეტის შუამავლობით მოხდა.

ინციდენტი 28 სექტემბერს მოხდა. ჯავის რაიონის 23 წლის მკვიდრმა ცეცხლსასროლ იარაღთან გაუფრთხილებელი მოპყრობის შედეგად თავის 10 წლის ძმას ცეცხლსასროლი ჭრილობა მიაყენა. თავდაპირველად ბავშვი ცხინვალის სამკურნალო ცენტრში გადაიყვანეს, მაგრამ შემდეგ თბილისში მისი ტრანსპორტირება გადაწყდა.

როგორც დე ფაქტო შს სამინისტროში განაცხადეს. ამჟამად ინციდენტის ყველა დეტალის დადგენა მიმდინარეობს.