ცოტა ხნის წინ ხმაური იყო ოზურგეთის ადმინისტრაციულ შენობასთან – დაცვა დეპუტატებს და ჟურნალისტებს შენობაში არ უშვებდა

დღეს დილით ხმაური იყო ოზურგეთის ადმინისტრაციულ შენობასთან. სამსახურში მისულ ოპოზიციონერ დეპუტატებს დაცვამ შენობაში შესვლაზე უარი უთხრა. შემაფერხებელი გარემოება ჟურნალისტები აღმოჩნდნენ, რომელთა შეშვებაზე დაცვის წევრებმა უარი თქვეს და ტრადიციული ფრაზით ”მიმართეთ პრესსამსახურს” შემოიფარგლნენ.

”წარმოუდგენელი ამბავია, ვარ დეპუტატი, ეს არის ჩემი სამსახური, მივდივარ ჩემს ოთახში, სადაც უნდა შევხვდე ჟურნალისტებს. რომელ პრესსამსახურს, ვის უნდა მივმართო, რომ ჩემი საქმიანობის განხორციელების უფლება მივიღო? რას ამბობთ, ხვდებით?” – დავით მჟავანაძის აღნიშნულ მიმართვაზე დაცვას იგივე პასუხი აღმოაჩნდა: ”მიმართეთ პრესსამსახურს”. თუმცა კონკრეტულად რომელ პრესამსახურს გულისხმობდნენ, აღარ დაუკონკრეტებიათ.

გარკვეული ხნის ლოდინის შემდეგ, დაცვამ, როგორც ჩანს, დირექტივა მიიღო და დეპუტატებსა და ჟურნალისტებს შენობაში შესვლის ნება მისცა.