ცოლ-ქმარი ავეჯის მაღაზიაში ვერ შეთანხმდნენ რომელი კარადა ეყიდათ, რის გამოც კონფლიქტი დაიწყო – ქმარის მიერ ცოლის მკვლელობის შესახებ დეტალები ხდება ცნობილი

გარდაბანში ქმარმა ცოლი მოკლა. ამის შესახებ ინფორმაციას შინაგან საქმეთა სამინისტროში ადასტურებენ.

Ambebi.ge-ს ინფორმაციით, მკვლელობა დღეს, გარდაბანში მდებარე ერთ-ერთ ავეჯის მაღაზიაში მოხდა. როგორც Ambebi.ge-ს წყარო უყვება, 50 წლამდე ასაკის ცოლ-ქმარი მაღაზიაში ავეჯის საყიდლად შევიდა, ისინი ვერ შეთანხმდნენ, რომელი კარადა ეყიდათ, რის გამოც კონფლიქტი დაიწყო. არსებული ინფორმაციით, ამ დროს მამაკაცმა ჯიბიდან დასაკეცი დანა ამოიღო და ცოლს მრავლობითი ჭრილობები მიაყენა.

ჟურნალისტი ჯეიჰუნ მუჰამედალი სოციალურ ქსელში მომხდარის შესახებ სხვა ვერსიაზე წერს – “ცოტა ხნის წინ, გარდაბნის ცენტრში ამ ბიჭმა ეს გოგო, ანუ ყოფილი ცოლი მოკლა. ცოტა ხნის წინ დაშორებულები ყოფილან და გოგო საზღვარგარეთ წასულა, დაბრუნებისას ბიჭს შერიგება უნდოდაო და გოგოსგან უარს იღებდა. ბოლოს გოგომ პოლიციას მიმართა, რომ შემაკავებელი ორდერი გაეცათ. თუმცა დღეს მაინც ასე ტრაგიკულად დასრულდა ეს ამბავი”.

გამოძიება 11 პრიმა 109-ე მუხლის კ ქვეპუნქტით მიმდინარეობს, რაც დამამძიმებელ გარემოებებში ოჯახის წევრის განზრახ მკვლელობას გულისხმობს.

უწყების ცნობით, ბრალდებული პოლიციაში თავად გამოცხადდა და აღიარებითი ჩვენება მისცა.