დავით ბაქრაძე „ევროპული საქართველოს“ თავმჯდომარეობას ტოვებს. გადაწყვეტილების შესახებ დავით ბაქრაძემ პარტიის ოფისში გამართული შეხვედრის შემდეგ, ბრიფინგზე განაცხადა. როგორც მან აღნიშნა, მიიღო გადაწყვეტილება, რომ პარტიის მომავალ ყრილობაზე თავისი კანდიდატურა თავმჯდომარეობაზე აღარ დააყენოს.
მმართველ პოზიციაზე დარჩენას არ აპირებს გიგი უგულავაც. იგი „ევროპული საქართველოს“ გენერალური მდივნის თანამდებობას ტოვებს. როგორც უგულავამ ბრიფინგზე განაცხადა, პარტიის მომავალ ყრილობაზე ის აღნიშნულ თანამდებობაზე საკუთარი კანდიდატურის დაყენებას აღარ აპირებს.
ამასთან, უგულავამ აღნიშნა, რომ 2020 წლის საპარლამენტო არჩევნებზე „ევროპული საქართველოს“ შედეგი იყო ძალიან ცუდი და ამაზე პასუხისმგებლობას იღებს.
„დავით ბაქრაძის მსგავსად, არც მე ვაპირებ, მომავალ ყრილობაზე ვიყარო კენჭი გენერლურ მდივნად. აღარ ვიქნები პარტიის გენერალური მდივანი. მიმაჩნია, რომ ეს არის ლოგიკური, სწორი და დროული. არ არსებობენ პარტიის ლიდერები უპირობოდ და უვადოდ. თავის დროზე, სწორედ ამას ვუთხარით უარი და მე ამ პრინციპის ერთგულ ვრჩები. მიუხედავად დრამატული გაყალბებისა, პარტიის შედეგი ბოლო არჩევნებზე იყო ძალიან ცუდი. შესაბამისად, ჩემს პასუხისმგებლობას ვიღებ და გზას ვუთმობ ადამიანებს, რომლებიც ამას გააკეთებდნენ უკეთესად“, – განაცხადა უგულავამ.
რაც შეეხება მის სამომავლო საქმიანობას, უგულავამ აღნიშნა, რომ პოლიტიკაში რჩება და მონაწილეობას მიიღებს საერთო ოპოზიციურ აქტივობებში.
პარტიულ თანამდებობის დატოვებას არ აპირებს გიგა ბოკერია.
“დიდ პატივს ვცემ გიგი უგულავას გადაწყვეტილებას. მე ასეთი გადაწყვეტილება არ მაქვს მიღებული. ამ თვეების განმავლობაში გავაგრძელებთ მუშაობას პარტიის შიგნით ჩვენს სტრატეგიაზე, – ამის შესახებ „ევროპული საქართველოს“ ერთ-ერთმა ლიდერმა, გიგა ბოკერიამ განაცხადა.
მისივე თქმით, აპირებს აქტიურ პოლიტიკაში დარჩეს, ხოლო თანამდებობასტან დაკავსირებით გადაწყვეტილებას შემდეგ ყრილობაზე მიიღებს.
„დისკუსიის პროცესი, თუ როგორ უნდა მოიქცეს პარტია მთელი ქვეყნისთვის და პარტიისთვის რთულ ვითარებაში, კარგა ხანია, დავიწყეთ. სამწუხაროდ, იმან, რომ არასწორი ფორმით გაჟონა ინფორმაციამ, ეს პროცესი დააჩქარა. ვისურვებდი, დიკუსიისთვის მეტი დრო ყოფილიყო.
Loading ...