ორსულობისა და მშობიარობის გამო, ასევე, ბავშვის მოვლისა და ახალშობილის შვილად აყვანის გამო შვებულებაზე გასაცემი დახმარების ჯამური ოდენობა კანონის ნაცვლად, მთავრობის დადგენილებით განისაზღვრება.
შესაბამისი ცვლილება “შრომის კოდექსში“ შედის, რომელიც პარლამენტს განსახილველად დაჩქარებული წესით წარედგინა.
მოქმედი “შრომის კოდექსით“ აღნიშნული თანხა კანონით არის განსაზღვრული და ის არაუმეტეს 1000 ლარს შეადგენს. კანონის პროექტით კი დგინდება მთავრობის ვალდებულება, თავად განსაზღვროს ორსულობისა და მშობიარობის გამო ანაზღაურებადი შვებულების, ასევე და ბავშვის მოვლის და ახალშობილის შვილად აყვანის გამო ანაზღაურებადი შვებულების პერიოდზე გასაცემი ფულადი დახმარების მაქსიმალური ჯამური ოდენობა.
კანონის პროექტის განმარტებით ბარათში ნათქვამია, რომ 2023 წლის სახელმწიფო ბიუჯეტის პროექტით გათვალისწინებულია აღნიშნული დახმარების ოდენობის გაზრდა და მისი გაორმაგება არაუმეტეს 2000 ლარამდე.
“უმჯობესდება დეკრეტული შვებულებით მოსარგებლე დასაქმებული მშობლების და მათი ბავშვების სოციალურ-ეკონომიკური მდგომარეობა, რადგან ისინი მიიღებენ დახმარების გაზრდილ ოდენობას. დახმარების ოდენობა, 2023 წლის 1 იანვრიდან გახდება არაუმეტეს 2 000 ლარისა“, – ვკითხულობთ პროექტის განმარტებით ბარათში.
Loading ...