ცვლილებები და რეგულაციები, რომელთა ამოქმედებაც ქვეყანაში და ქვეყნის გარეთ აპრილიდან იგეგმება

მიმდინარე წლის აპრილიდან საქართველოსა და მის ფარგლებს გარეთ გარკვეული ცვლილებები ამოქმედდება.

„ბიზნესპრესნიუსი“ გთავაზობთ ინფორმაციას, იმ რეგულაციების შესახებ, რომელთა ამოქმედებაც უკვე ხვალიდან იგეგმება.

რა ცვლილებების ამოქმედება იგეგმება აპრილიდან

• დენის ტარიფი იზრდება

1-ელი აპრილიდან თბილისსა და რეგიონებში ელექტროენერგიის ტარიფი 5 თეთრით ძვირდება.

ცვლილება შეეხება, როგორც მოსახლეობას ასევე ბიზნესს, რადგან იზრდება ელექტროენერგიის, როგორც საყოფაცხოვრებო, ისე არასაყოფაცხოვრებო ტარიფი.

უფრო კონკრეტულად, თბილისში „თელმიკოს“ იმ მომხმარებლებისთვის, რომლებიც ყოველთვიურად 0-დან 101 კილოვატამდე ელექტროენერგიას მოიხმარდნენ და ერთ კილოვატში 15.041 თეთრს იხდიდნენ, 1-ლი აპრილიდან ტარიფი 20.041 თეთრამდე გაეზრდებათ. 101-301 კილოვატ საათის ჩათვლით მომხმარებლებისთვის ტარიფი 19.053 თეთრიდან 25.053 თეთრამდე მოიმატებს, ხოლო 301 კილოვატზე მეტი ელექტროენერგიის მომხმარებლებისთვის ტარიფი 23.537 თეთრიდან 28.537 თეთრამდე გაიზრდება.

რაც შეეხება რეგიონში მცხოვრებ აბონენტებს, მათთვის, ვინც 0-დან 101 კილოვატამდე ელექტროენერგიას მოიხმარდა, ტარიფი 14.731 თეთრიდან 19.731 თეთრამდე იზრდება. 101-301 კილოვატ საათის ჩათვლით მომხმარებლებისთვის ტარიფი 18.708 თეთრიდან 23.707 თეთრამდე იზრდება, ხოლო 301 კილოვატზე მეტი ელექტროენერგიის მომხმარებლებისთვის ტარიფი 23.227 თეთრიდან 28.227 თეთრამდე მოიმატებს.

რაც შეეხება კომერციულ სექტორს, ტარიფი დაახლოებით, 5-6 თეთრით ეზრდება.

• პლასტიკის მოხმარება კიდევ ერთი რეგულაციით შეიზღუდება

2026 წლის 1-ლი აპრილიდან, პლასტიკის მოხმარების შემცირების მიზნით, აიკრძალება პლასტმასის ჭიქების, კონტეინერების და პლასტმასის 3 ლიტრამდე ბოთლებით სასმლის შეძენა იმ ორგანიზაციებისთვის, რომლებიც სახელმწიფო შესყიდვებს ახორციელებენ.

ამასთან, გარემოს დაცვისა და სოფლის მეურნეობის სამინისტროს ინფორმაციით, განკარგულება არ ვრცელდება იმ სახელმწიფო შესყიდვებზე, რომელიც ხორციელდება თავდაცვის ძალებისა და სამხედრო მოსამსახურეთა საჭიროებისთვის.

• დეპოზიტარისთვის ასანაზღაურებელი თანხის მაქსიმალური ოდენობა გაიზრდება

2026 წლის 1-ლი აპრილიდან დეპოზიტარისთვის ასანაზღაურებელი თანხის მაქსიმალური ოდენობა გაიზრდება.

კერძოდ, „დეპოზიტების დაზღვევის სისტემის შესახებ“ საქართველოს კანონში შეტანილი ცვლილებით, სადაზღვევო თანხის მაქსიმალური ზღვარი 50 000 ლარი იქნება.

შეგახსენებთ, რომ დეპოზიტების დაზღვევის სისტემა საქართველოში 2018 წლის იანვრიდან ამოქმედდა. თავდაპირველად დეპოზიტორისთვის ასანაზღაურებელი დაზღვეული დეპოზიტის ანაზღაურებადი თანხის მაქსიმალურ ოდენობად 5 ათასი ლარი განისაზღვრა; 2020 წლის ივლისიდან ეს ზღვარი 15 ათასამდე გაიზარდა, ხოლო 2024 წლის 1-ლი იანვრიდან 30 ათასი ლარი გახდა.

• დაცულ ტერიტორიებზე შესვლა ძვირდება

1-ელი აპრილიდან საქართველოს დაცულ ტერიტორიებზე შესასვლელი ბილეთის ფასები იზრდება.

ვიზიტორებს სხვადასხვა კატეგორიების მიხედვით ბილეთის ფასები 3-დან 20 ლარის ფარგლებში გაძვირებული დახვდებათ.

• ფსიქოტროპული მედიკამენტების ელექტრონული რეცეპტის გაცემის წესში ცვლილებები ამოქმედდება

1-ელი აპრილიდან ფსიქოტროპული მედიკამენტების რეფორმის ფარგლებში, მედიკამენტების ელექტრონული რეცეპტის გაცემის წესში ცვლილებები ამოქმედდება.

ჯანდაცვის სამინისტროს ცნობით, ცვლილების მიზანი კონტროლის გამკაცრება, მათი არამიზნობრივი გამოყენებისა და არასათანადო მოხმარების პრევენციაა.

უწყების ინფორმაციით, ცვლილების თანახმად, რეცეპტით მედიკამენტის გაცემის მაქსიმალური რაოდენობა განისაზღვრა: სრულწლოვანი პაციენტისთვის – არაუმეტეს 14 დღის მარაგით, ხოლო არასრულწლოვანისთვის – არაუმეტეს 30 დღის მარაგით.

1-ლი აპრილიდან, ახალი რეცეპტის გამოწერა დასაშვები იქნება, იმ შემთხვევაში, თუ პაციენტს დარჩენილი აქვს არაუმეტეს 5 დღის მარაგი.

• აშშ-ის სახდეპი საქართველოს მოქალაქეებისთვის ახალ წესს აამოქმედებს

2026 წლის 2 აპრილიდან აშშ-ის სახელმწიფო დეპარტამენტი საქართველოს მოქალაქეებისთვის ახალ წესს აამოქმედებს.

კერძოდ, B1/B2 (ტურისტული/ბიზნეს) ვიზის მისაღებად საჭირო იქნება 5 ათასიდან 15 000 დოლარამდე დეპოზიტის გადახდა.

აშშ-ის საელჩოს ინფორმაციით, საქართველოს მოქალაქეებმა საკონსულოს მიერ დადგენილი დეპოზიტი გასაუბრების წარმატებით გავლის შემდეგ უნდა გადაიხადონ, ხოლო იმ შემთხვევაში, თუ გადახდა არ განხორციელდა, ვიზა არ გაიცემა.

• მეწარმე სუბიექტებს განახლებული რეგისტრაცია უნდა ჰქონდეთ გავლილი

2026 წლის 1-ლი აპრილიდან, მეწარმე სუბიექტებს თავიანთი სარეგისტრაციო მონაცემები „მეწარმეთა შესახებ” საქართველოს კანონთან შესაბამისობაში უნდა ჰქონდეთ მოყვანილი.

კანონის თანახმად, რეგისტრაციის განახლების ვალდებულება ვრცელდება 2022 წლის 1-ელ იანვრამდე რეგისტრირებულ შემდეგი ტიპის საწარმოებზე: შეზღუდული პასუხისმგებლობის საზოგადოება, სოლიდარული პასუხისმგებლობის საზოგადოება, სააქციო საზოგადოება, კომანდიტურ საზოგადოება, კოოპერატივი და უცხოური საწარმოს ფილიალი.

იმ შემთხვევაში, თუ 1-ლი აპრილიდან, საწარმოს/ფილიალს კანონთან შესაბამისობაში არ ექნება მონაცემები მოყვანილი, რეგისტრაცია შეუჩერდება. ეს კი იმას ნიშნავს, რომ არ გაიცემა ამონაწერი განახლებული სახით, არ ექნებათ წვდომა ფინანსურ რესურსებზე, საბანკო პროდუქტებზე და ა.შ.

• 1-ლი აპრილიდან ახალი საირიგაციო ტარიფები ამოქმედდება

1-ლი აპრილიდან ქვეყანაში სემეკის მიერ დადგენილი ირიგაციის მომსახურების ახალი ტარიფი ამოქმედდება.

კერძოდ, ახალი ტარიფი გამრიცხველიანებული წყალმომხმარებლისთვის განისაზღვრა, 2026 წლის პირველი აპრილიდან 2026 წლის 31 დეკემბრის ჩათვლით გაწეული მომსახურებისთვის, ერთწლოვანი კულტურისთვის წელიწადში – 116 ლარამდე 1 ჰექტარზე, ხოლო მრავალწლოვანი კულტურისთვის – 102 ლარამდე ოდენობით 1 ჰექტარზე.

თუმცა, აღსანიშნავია, რომ საანგარიშო პერიოდში პროფილურ წყალმომხმარებლებსა (გარდა წყალმომხმარებელთა ორგანიზაციისა) და სატბორე მეურნეობებს საირიგაციო წყლის მიწოდების საფასურს სახელმწიფო ნაწილობრივ დაუსუბსიდირებს. იხილეთ დეტალურად სუბსიდირების სქემა:

• პარლამენტი განიხილავს კანონპროექტს, რომლითაც აპრილიდან ძველი ავტომობილების განბაჟების ტარიფი ზრდა იგეგმება

ქვეყანაში ძველი ავტომობილების განბაჟების ტარიფის ზრდა იგეგმება. კანონპროექტს, რომლის თანახმადაც, უკვე 2 აპრილიდან ქვეყანაში შემოყვანილი ავტომობილების განბაჟების გაძვირება მოხდება, ხვალ – 1-ელ აპრილს მეორე და მესამე მოსმენით მიიღებენ.

ცვლილებების შედეგად, აქციზის განაკვეთი 0-დან 6 წლის ჩათვლით ასაკის ავტომობილებისთვის ძრავის მოცულობის 1 კუბურ სანტიმეტრზე 1.5 ლარის, ხოლო 6 წელზე მეტი ასაკის ავტომობილებისთვის აქციზის განაკვეთი 1 კუბურ სანტიმეტრზე 4.5 ლარის ოდენობით განისაზღვრება.

შესაბამისად, გამოდის, რომ უკვე 2 აპრილიდან ქვეყანაში ამ წლოვანების ავტომობილის შემოყვანის შემთხვევაში მფლობელს/იმპორტიორს განბაჟების გაზრდილი გადასახადის გადახდა მოუწევს.

• რუსეთი ბენზინის ექსპორტს კრძალავს

2026 წლის 1-ელი აპრილიდან რუსეთი ბენზინის ექსპორტს აკრძალავს.

მთავრობის განმარტებით, აღნიშნული გადაწყვეტილების მიზანია შიდა ბაზარზე ფასების სტაბილიზაცია და საწვავის პრიორიტეტული მიწოდების უზრუნველყოფა.

ამასთან, მთავრობის ინფორმაციით, ნავთობის გადამუშავების მოცულობა გასული წლის დონეზე ნარჩუნდება, რაც ნავთობპროდუქტების სტაბილურ მიწოდებას უზრუნველყოფს.

აღსანიშნავია, რომ ახლო აღმოსავლეთში მიმდინარე საომარი მოქმედებების ფონზე, შეფერხებულია ჰორმუზის სრუტის გავლით გადაზიდვები. ეს მაშინ, როდესაც მსოფლიო ნავთობის მომარაგების დაახლოებით მეხუთედი, სწორედ, ჰორმუზის სრუტით ხორციელდებოდა. სრუტეში გადაადგილება თითქმის შეჩერებულია, რაც გავლენას ახდენს „შავი ოქროს“ გლობალურ ფასებზე. სავარაუდოა, რომ რუსეთის მიერ ბენზინის ექსპორტის აკრძალვა კიდევ დამატებითი წნეხი იქნება ენერგომატარებლების ფასზე.

• ბარსელონა ტურისტულ გადასახადს ზრდის

ბარსელონა აპრილიდან ღამისთევაზე ტურისტული გადასახადის გაზრდას გეგმავს.

ახალი წესების თანახმად, მოკლევადიან აპარტამენტებზე დამატებითი მოსაკრებელი ღამეში 6.25-დან 12.50 ევრომდე გაიზრდება.

ტურისტული გადასახადის ზრდა ყველაზე მეტად სასტუმროებს შეეხება, სადაც ღამისთევაზე დამატებითი მოსაკრებელი, სასტუმროს კატეგორიის მიხედვით, 10-დან 15 ევრომდე გაიზრდება, მაშინ, როცა მანამდე 5–7.50 ევროს შეადგენდა.

www.bpn.ge