საერთაშორისო მნიშვნელობის თბილისი-სენაკი-ლესელიძის ავტომაგისტრალის 26-ე კილომეტრზე, მდინარე არაგვზე არსებულ ხიდზე (მარცხენა მხარე, თბილისის მიმართულებით) დაზიანდა სავალი ნაწილის ფილა — ამის შესახებ ინფორმაციას საავტომობილო გზების დეპარტამენტი ავრცელებს.
დეპარტამენტის ცნობით, უსაფრთხოების მიზნით ხორციელდება დაზიანებული ფილის დემონტაჟი, არმირების გაძლიერება და ახალი ფილის მოწყობა. აღნიშნული სარემონტო სამუშაოების გამო, ხიდზე მოძრაობა მიმდინარეობს მხოლოდ ერთი ზოლის ფარგლებში.
ერთზოლიანი მოძრაობის რეჟიმი შენარჩუნდება ხვალ დილის 07:00 საათამდე.
დეპარტამენტი ასევე აღნიშნავს, რომ არსებული ხიდის გვერდით უკვე აშენდება ახალი ხიდი, რომლის ექსპლუატაციაში გაშვება მომავალი წლისთვის არის დაგეგმილი.
უწყება წერს რომ ხიდი, რომელიც ამჟამად ექსპლუატაციაშია, 1973 წელს აშენდა და ხშირად საჭიროებს აღდგენით სამუშაოებს, რაც პერიოდულად ზღუდავს მოძრაობას და დისკომფორტს უქმნის მგზავრებს.
შეგახსენებთ, მაისში გაირკვა, რომ საქართველოს მთავრობამ საავტომობილო გზების დეპარტამენტს ფორსმაჟორის გამო, მდინარე არაგვზე ახალი ხიდის მშენებლობის ნებართვა გზშ-ის, ანუ გარემოზე ზემოქმედების შეფასების გარეშე მიანიჭა. მთავრობის 8 მაისის განკარგულების თანახმად, აღნიშნული ფორსმაჟორული ვითარებიდან გამომდინარე არის აუცილებელი. ახალი ხიდი მდინარე არაგვზე არსებული ხიდის პარალელურად აშენდება.
2023 წლის დეკემბრიდან 2025 წლის 2 აპრილამდე სავალი ნაწილის ფილა სხვადასხვა ადგილზე ლოკალურად 8 ჯერ დაზიანდა, მათ შორის, ხიდის ფილის აღდგენის მიზნით, სამჯერ საჭირო გახდა ხიდზე 10-დღიანი პერიოდით, ერთი სამოძრაო ზოლის შეზღუდვა, შესაბამისი სამუშაოების განხორციელების მიზნით.
Loading ...