ზემო ოსიაური-ჩუმათელეთის გზის მეორე მონაკვეთის (სურამის შემოვლითი გზა) სამშენებლო სამუშაოები დასრულების ფაზაშია – ამის შესახებ ინფორმაციას ინფრასტრუქტურის სამინისტრო ავრცელებს.
უწყების ცნობით, ზემო ოსიაური–ჩუმათელეთის ჩქაროსნული გზის მონაკვეთი ავტოტრანსპორტისთვის
წელს გაიხსნება, თუმცა პრესრელიზში მშენებლობის დასრულების ზუსტი დრო დაკონკრეტებული არ არის.
სურამის შემოვლითი გზა აღმოსავლეთ–დასავლეთის ჩქაროსნული ავტომაგისტრალის მნიშვნელოვანი ნაწილია და მისი მშენებლობის პროექტს ინფრასტრუქტურის სამინისტროს საავტომობილო გზების დეპარტამენტი ახორციელებს.
მიმდინარე სამუშაოები ინფრასტრუქტურის მინისტრმა, რევაზ სოხაძემ, მოადგილეებთან და ადგილობრივი ხელისუფლების წარმომადგენლებთან ერთად დაათვალიერა.
ახალი მონაკვეთი მოიცავს 4-ზოლიან, 6.4 კმ-იან მაგისტრალს, 11 ხიდსა და 5 გვირაბს. ამ დროისათვის, ყველა ხიდი და გვირაბი უკვე აშენებულია. მიმდინარეობს გვირაბებში ელექტრომექანიკური სისტემების, განათებისა და სავენტილაციო აღჭურვილობის მონტაჟი, ხიდებსა და გვირაბებში გზის საფარის დაგება. ასევე, დაწყებულია გვირაბების მართვის შენობების მშენებლობა.
ზემო ოსიაური-ჩუმათეთელის გზის მეორე მონაკვეთი, ხაშურის შემოვლითი 13 კმ-იანი გზის გაგრძელებაა. ახალი გზა გვერდს აუვლის სურამსა და ჩუმათელეთს და რიკოთის საუღელტეხილო გზის პირველ გვირაბს შეუერთდება.
გზის ამ მონაკვეთის მშენებლობის ხელშეკრულება 2020 წლის დეკემბერში გაფორმდა და ის 4 წელში უნდა დასრულებულიყო. გზის მშენებლობას 265 მილიონი ლარით მსოფლიო ბანკი აფინანსებს, ხოლო მისი კონტრაქტორი ჩინური კორპორაცია “სინოჰიდრო” აშენებს.
ზემო ოსიაური ჩუმათელეთის გზის მშენებლობისთვის თავდაპირველად კონტრაქტი 2017 წელს კომპანია Astaldi-სთან გაფორმდა, თუმცა კომპანიამ ნაკისრი ვალდებულება არ შეასრულა, რის გამოც მთავრობამ მასთან სამართლებრივი დავა დაიწყო.
www.bm.ge
Loading ...