“ჩვენი ომი არ არის ომი და უკრაინაში არსებული ომი ომია?! ” – ღარიბაშვილი კატარის ფორუმზე

ჩვენი ომი არ არის ომი და უკრაინაში არსებული ომი ომია?! სად არის ლოგიკა – ამის შესახებ კატარის ფორუმის ფარგლებში გამართულ პანელურ დისკუსიაზე ირაკლი ღარიბაშვილმა განაცხადა.

ღარიბაშვილმა ფორუმზე პირდაპირ თქვა, რომ 2008 წლის ომის დროს არავის მსოფლიოში არ დაუწესებია რუსეთისთვის სანქცია.

“საქართველოს ეკონომიკა დაინგრევა, ჩვენ ზიანს მივაყენებთ ჩვენ ხალხს, თუ მსგავს ეკონომიკურ სანქციებს დავუწესებთ რუსეთს, ორმხრივს, მაგრამ დავიწყებ იმის თქმით, რაც თავში თქვი, კარგად იცით, 2008 წელს გვქონდა ჩვენ ომი, თქვენ კარგად გემახსოვრებათ, გახსოვთ ვინმე ვინც დააწესა სანქციები რუსეთს მიმართ ჩვენი ომის დროს?! არავინ, არავინ მსოფლიოში არ იქონია სწორი რეაქცია, არც ადეკვატური რეაქცია არ ჰქონია იმ ომის შემთხვევაში, ამიტომ ჩემი კითხვა ისმის ასე, სად არის ლოგიკა, ჩვენი ომი არ არის ომი და უკრაინაში არსებული ომი ომია?! მე უნდა ვთქვა, რომ ძალიან იმედგაცრუებულები ვიყავით, რომ ბიზნესი ჩვეულებრივ რეჟიმში მიმდინარეობდა რუსეთთან 2008 წლის ომის შემდეგ”. 

პრემიერის შეფასებით, ევროპას მსგავსი მასშტაბის გამოწვევა მეორე მსოფლიო ომის შემდეგ არ უნახავს.

„რთული დროა ნამდვილად. ევროპას მსგავსი მასშტაბის გამოწვევა არც უნახავს მეორე მსოფლიო ომის შემდეგ და ამიტომ ეს ომი ყველას გვეხება. მაგრამ აქვე მინდა შეგახსენოთ, რომ საქართველოს 2008 წელს ჰქონდა ომი და ჩვენ ზუსტად ვიცით რას ნიშნავს ომი. ამ ომის დაწყების დღიდან დღეს უკვე ვიცით, რომ უკრაინის 20% არის ოკუპირებული რუსეთის მიერ, ეს არის დღევანდელი სტატუს კვო, რა მოხდება ხვალ არ ვიცი, ვერ ვიტყვი, მე მგონი არც არავინ იცის“, – განაცხადა ირაკლი ღარიბაშვილმა.

კითხვაზე გიკვირთ თუ არა, რომ უკრაინამ „ამდენი ხანი გაძლო?“ – პრემიერმა უპასუხა, რომ მისი შეფასებით, ეს ყველას უკვირს და ვერ ხედავს ნიშანს, რომ ეს ომი მალე დასრულდება.

„მე მგონი ყველას უკვირს. მე ვერ ვხედავ იმის ნიშანს, რომ ეს ომი მალე დასრულდება. ეს არის პრობლემა, მაგრამ ვერ ვხედავთ საკმარის ძალისხმევას საერთაშორისო თანამეგობრობის მხრიდან, რომ სწორი ზომები განახორციელონ, რომ სამშვიდობო საუბარი წარიმართოს“, – განაცხადა პრემიერმა.