ალერგოლოგ-იმუნოლოგი ბიძინა კულუმბეგოვი მიიჩნევს, რომ კოვიდ-ინფიცირების შემთხვევების მატების შესაჩერებლად, სახელმწიფომ რისკის ქვეყნებიდან ტურისტების შემოსვლა უნდა აკრძალოს. როგორც მან “რუსთავი 2”-თან ინტერვიუში აღნიშნა, ქვეყნის მთავარი პრობლემა არსებულ პირობებში, როდესაც მაღალია დღიური ინფიცირების რაოდენობა, ვაქცინაციის დაბალი მაჩვენებლებია. კულუმბეგოვის თქმით, ამას ემატება ქვეყნის სრული გახსნა და დერეგულაცია.
„სამწუხაროდ, ჩვენ ამით ვერაფერი მოვიგეთ. რისკის ქვეყნებიდან უნდა აიკრძალოს ტურისტების შემოსვლა. ქვეყნები უკან დაბრუნებულ მოქალაქეებს კარანტინს მოსთხოვენ, ამიტომ ტურისტების შემოდინება მაინც შემცირდება. ჩვენთვის რისკის ქვეყნებს შორის არის ჩრდილოელი მეზობელი, საიდანაც გაყალბებული ცნობებით მოდიან. ადამიანების ძალიან დიდი ნაწილი მინიმალური თანხის საფასურად აყალბებს PCR-ის ცნობებს, ამიტომ ეს საკმარისი არ უნდა იყოს მათი აქ შემოშვებისთვის. ალბათ, კარანტინის რეჟიმი უნდა დაწესდეს. ასეთი ტიპის რეგულაციები ერთ-ერთი გამოსავალი იქნება. სამედიცინო სფეროს წარმომადგენლები ძალიან დიდი რისკის წინაშე დგანან, სამწუხაროდ დაბალი სამედიცინო პერსონალი ამას ვერ აცნობიერებს, ამიტომ ალბათ ქვეყანამ უნდა მიიღოს გადაწყვეტილება და სავალდებულო ვაქცინაცია სამედიცინო პერსონალს შორის მაინც უნდა დააწესოს“, – განაცხადა მან.
ცნობისთვის, დღეს საქართველოში 2021 წლის განმავლობაში COVID-19-ით ინფიცირების რეკორდული – 2,616 ახალი შემთხვევა გამოვლინდა. აქამდე მიმდინარე წლის ახალი შემთხვევების მაქსიმალური რაოდენობა 2,171 იყო, რაც 5 მაისს დაფიქსირდა.
Loading ...
