ჩეხეთში, საცხოვრებელ ეზოში თვითმფრინავი ჩამოვარდა – დაიღუპა 2 ადამიანი

ჩეხეთში ავიაკატასტროფა მოხდა. თვითმფრინავის ჩამოვარდნის შედეგად 2 ადამიანი დაიღუპა.

მედიის ცნობით, თვითმფრინავი საცხოვრებელი სახლის ბაღში ჩამოვარდა, სადაც არავინ იმყოფებოდა.

შემთხვევის ადგილზე მობილიზებული იყო სამაშველო სამსახური, ასევე, სამაშველო სამუშაოებში ჩართული იყო ორი საჰაერო სამაშველო ვერტმფრენი.

„2-მა ადამიანმა მიიღო მძიმე მრავლობითი დაზიანებები. მიუხედავად ყველა მცდელობისა და რეანიმაციული ღონისძიებებისა, რომელიც დაახლოებით 40 წუთს გაგრძელდა, ისინი სამწუხაროდ დაიღუპნენ მიყენებული დაზიანებებისგან“, – განაცხადა სამაშველო სამსახურის სპიკერმა მონიკა ნოვაკოვამ.

ავიაკატასტროფის გამომწვევი მიზეზები ამ ეტაპზე უცნობია. აღნიშნულ ფაქტთან დაკავშირებით გამოძიება მიმდინარეობს.