შსს-მ „ალტ-ინფოს“ აქციაზე 26 ადამიანი დააკავა, მათ შორის, ლიდერები

„თბილისის პრაიდის“ მუსიკალური ფესტივალის საწინააღმდეგო აქციაზე პოლიციამ დააკავა 26 ადამიანი, მათ შორის, რადიო თავისუფლების ინფორმაციით, „ალტ-ინფოს“ ლიდერები – ზურა მახარაძე და ირაკლი მარტინენკო. ასევე, მამა-შვილი, გურამ და ალექსანდრე ფალავანდიშვილები.

ისინი დააკავეს ადმინისტრაციული წესით, ხულიგნობისა და პოლიციის მოთხოვნისადმი დაუმორჩილებლობის ბრალდებით და ამას კავშირი არ აქვს სავარაუდო მუქარისა და ძალადობისკენ მოწოდების ფაქტზე დაწყებულ გამოძიებასთან. მის ფარგლებში, 27 ივნისს პოლიციამ გამოკითხა ზურა მახარაძე, კოკა მორგოშია და შოთა მარტინენკო.

2 ივლისს თბილისში დაგეგმილია “პრაიდ კვირეულის” ბოლო ღონისძიება, ქვიარ მუსიკალური ფესტივალი.

გასული წლის მოვლენების გათვალისწინებით, როცა ქუჩაში გამოსულმა ადამიანების მასამ ორგანიზებულად იძალადა მედიის 50-ზე მეტ წარმომადგენელზე, წელს „თბილისი პრაიდმა“ უარი თქვა საჯარო მანიფესტაციაზე. ამის მიუხედავად, „კვირეულის“ დაანონსებისთანავე ულტრაკონსერვატორები მის ჩაშლაზე საუბრობენ საკუთარი ტელევიზიის, „ალტ-ინფოს“ ეთერში თუ სხვა პლატფორმებზე.