შრომის ინსპექციის სამსახურის უფროსის, ბექა ფერაძის განცხადებით, ხვალიდან თუ რომელიმე ობიექტი „მწვანე ბარათების“ კონცეფციას არ დანერგავს პირველ ეტაპზე სანქცია ფიზიკური პირებისთვის 2000 ლარის ოდენობით, ხოლო იურიდიული პირების მიმართ 10 000 ლარის ოდენობით იქნება განსაზღვრული.
ამასთან ფერაძის განცხადებით, თუ რომელიმე ბიზნეს ობიექტის მხრიდან სისტემური იქნება დარღვევები, ან ესა თუ ის ობიექტი საერთოდ არ დანერგავს შესაბამის აპლიკაციას, შრომის ინსპექცია უფლებამოსილი იქნება გარკვეული დროით შეუზღუდოს ეკონომიკური საქმიანობა.
„შრომის ინსპექცია ხვალიდან დაიწყებს აღსრულებას შესაბამისი კოვიდ აპლიკაცია რამდენად არის დანერგილი სხვადასხვა ობიექტზე. პირველი დღეები იქნება სარეკომენდაციო ხასიათის და ჩვენ დავეხმარებით როგორც ბიზნეს ობიექტებს ასევე მოქალაქეებს, რომ მათ შეუფერხებლად გადმოწერონ ის სერვისები, რაც გავრცელებულია მოქმედი კანონმდებლობით.
რაც შეეხება გრძელვადიან პერსპექტივაში, ჩვენ მთელი ქვეყნის მასშტაბით სხვადასხვა უწყებებთან ერთად აღვასრულებთ აღნიშნულ მოთხოვნებს, რაც დადგენილებით არის გათვალისწინებული. ეს ნიშნავს იმას, რომ თუ რომელიმე ობიექტი არ დანერგავს „მწვანე ბარათების“ კონცეფციას, პირველ ეტაპზე სანქცია გათვალისწინებული იქნება ფიზიკური პირებისთვის 2000 ლარის ოდენობით, ხოლო იურიდიული პირების მიმართ სანქცია გათვალისწინებულია 10 000 ლარის ოდენობით. განმეორება იწვევს სისხლის სამართლის პასუხისმგებლობას, როგორც ეს გათვალისწინებულია იზოლაციისა და კარანტინის წესების დარღვევისთვის.
ასევე მინდა ინფორმაცია მივაწოდო ბიზნეს ობიექტებს, რომ თუ სისტემური იქნება დარღვევები და საერთოდ არ დანერგავს ესა თუ ის ობიექტი შესაბამის აპლიკაციას, შრომის ინსპექცია უფლებამოსილი იქნება გარკვეულწილად, დროებით შეუზღუდოს ეკონომიკური საქმიანობა ამა თუ იმ ობიექტს.
მინდა ხაზი გავუსვა ასევე, რომ ეს არ არის სადამსჯელო. აღნიშნული აპლიკაციები ჯანდაცვის სამინისტროს მიერ დანერგილია იმისთვის, რომ უზრუნველყოს ერთის მხრივ მოქალაქეების დაცულობა და ვირუსის გავრცელების პრევენცია, ხოლო მეორეს მხრივ შევინარჩუნოთ ეკონომიკური მდგრადობა ბიზნესის ხანგრძლივი ოპერირებისთვის. ეს არის აპრობირებული და საკმაოდ კარგად დანერგილი მეთოდი ევროკავშირის ქვეყნებში, რომლებმაც პანდემიის მართვა აირჩიეს და სწორედ აღნიშნული აპლიკაციის წარმატებით დანერგვის შემთვევაში შესაძლებელი იქნება, რომ საკოორდინაციო საბჭომ მიიღოს გადაწყვეტილება არა შემზღუდველ ინიციატივებთან დაკავშირებით, არამედ აღნიშნული მეთოდით, ეფექტურად თანამედროვე მეთოდებით იმართოს პანდემია და გრძელვადიან პერსპექტივაში ამით, როგორც ეკონომიკური მდგრადობა, ასევე დასაქმების ადგილები იქნება შენარჩუნებული და რაც ყველაზე მთავარია ადამიანის ჯანმრთელობა“, – განაცხადა ფერაძემ.
Loading ...
