„შოკოლადის ფილა ფუფუნება გახდება“ – მსოფლიო ბაზარზე შოკოლადის ფასი იზრდება

განა და მისი მეზობელი კოტ-დ’ივუარე მიმდინარე სეზონზე კაკაოს მოსავლიანობის კუთხით კატასტროფის წინაშე დგანან. სწორედ მათ უჭირავთ კაკაოს გლობალურ მიწოდებაში 60%-იანი წილი. ცუდი მოსავლიანობის გამო, მსოფლიო ბაზარზე კაკაოს მარცვლის დეფიციტია მოსალოდნელი. ამას აჩვენებს ნიუ-იორკის ბაზარზე კაკაოს ფიუჩერსებზე თითქმის ყოველდღიურად ფასის რეკორდული მატება.

როგორც Reuters-ი წერს, კაკაოს მოსავლიანობის შემცირება უკავშირდება კლიმატის ცვლილებებს, სექტორის არასწორ მენეჯმენტს, სწრაფად გავრცელებად დაავადებებსა და არალეგალურად ოქროს მოპოვების შედეგად გამოწვეულ პრობლემებს.

ჯერ კიდევ 2018 წელს გამოცემამ მოიპოვა მონაცემები, რომლის მიხედვითაც, განას კაკაოს მარკეტინგის საბჭოს Cocobod-ის შეფასებით, 590 000 ჰექტარი პლანტაციები დაავადებული იყო. დღეს განას კაკაო დაახლოებით 1,38 მილიონ ჰექტარზე აქვს გაშენებული, Cocobod-ის განცხადებით, აღნიშნული მოიცავს დაავადებულ ხეებსაც.

კაკაოს მარცვალი არის ძირითადი პროდუქტი, რომლითაც მსოფლიო ბაზარზე შოკოლადი იწარმოება. კაკაოს მარცვლის დეფიციტის შედეგად გამოწვეული ფასის მატება უკვე აისახა მსოფლიო ბაზარზე შოკოლადის ფასზეც. კვლევითი ფირმა NielsenIQ-ის მონაცემებით, აშშ-ში წელს შოკოლადი იმაზე 10%-ით ძვირია, ვიდრე გასული წლის იმავე პერიოდში.

„შოკოლადის ფილა, რომლის მირთმევას მიჩვეული ვართ, ფუფუნება გახდება. ის ხელმისაწვდომი იქნება, მაგრამ ორჯერ უფრო ძვირად“, – თქვა Kleos Advisory-ის წარმომადგენელმა ტედ ჯორჯმა.

მკვლევრები ვარაუდობენ, რომ კლიმატის ცვლილება გაართულებს მოსავლის წარმოებას დასავლეთ აფრიკაში უახლოეს ათწლეულებში. ანალიტიკოსები ვარაუდობენ, კოტ-დ’ივუარის კაკაოს პლანტაციები 2050 წლისთვის 50%-ზე მეტით შემცირდება. VOICE Network-ის შეფასებით, 2027 წლისთვის ეკვადორი გადაუსწრებს განას კაკაოს წარმოებაში და მსოფლიოში ნომერ 2 კაკაოს მწარმოებელი გახდება.

www.bpn.ge