თბილისში, პარლამენტის შენობასთან მიმდინარე საპროტესტო აქციაზე “სირცხვილიას” ლიდერმა, შოთა დიღმელაშვილმა, მას შემდეგ რაც პრემიერ-მინისტრ ირაკლი ღარიბაშვილის გადადგომა წამოაყენა მოთხოვნად და ამისთვის ერთი კვირის ვადა მისცა მთავრობას, მომდევნო დღეების გეგმები გააცნო საზოგადოებას. შოთა დიღმელაშვილის თქმით, მომდევნო ერთი კვირის განმავლობაში მოძრაობა ივლის რეგიონებში, ერთი კვირის შემდეგ კი ყველა ერთად დაიძვრება თბილისში და საპროტესტო აქცია არ დაიშლება მანამ, სანამ მიზანს არ მიაღწევს.
“იმ შემთხვევაში, თუ ბიძინა ივანიშვილი პირადად ყურად არ იღებს ქართველი ერის ნებას, ჩვენ მოვალთ კიდევ უფრო მეტი, ვიდრე ვართ დღეს, ვიდრე ვიყავით 20 ივნისს და ვანახებთ ქართველი ხალხის რისხვას. მანამდე ჩვენ მივალთ ყველგან, თქვენ მიხვალთ ყველასთან, ყველა ქალაქში, ყველა სოფელში, დავაწმუნებთ ხალხს, სად სუფევს საქართველოს ხსნის გზა. 3 ივლისს, წამოვალთ ყველა ქალაქიდან, ყველა სოფლიდან, შეუერთებთ ერთმანეთს ნაკადებს და მოვალთ პარლამენტის წინ, თბილისში. არ დავიშლებით მანამ, სანამ არ დაიშლება ოლიგარქია” – თქვა შოთა დიღმელაშვილმა. მისი გამოსვლის დასასრულს რუსთაველზე შეკრებილი ხალხი სკანდირებდა, “წადი.”
რუსთაველზე შეკრებილია მთავრობის საქმიანობით უკმაყოფილო მოსახლეობა, ვინც ფიქრობს, რომ ხელისუფლებამ საკმარისი ძალისხმევა არ გასწია საქართველოს ევროკავშირში ინტეგრაციისთვის. 23 ივნისს ევროპულმა საბჭომ უკრაინასა და მოლდოვას ევროკავშირის წევრობის კანდიდატის სტატუსი მიანიჭა, საქართველოს კი – ევროპული პერსპექტივა და განაცხადა, რომ მზადაა კანდიდატის სტატუსი მისცეს, როგორც კი დასახული პრიორიტეტები შესრულდება.
www.radiotavisupleba.ge
Loading ...