შოვში ნაპოვნი 21 ცხედრიდან 19 იდენტიფიცირებულია – ონის მერი

ონის მერის სერგო ხიდეშელის ინფორმაციით, შოვში, სტიქიის ზონაში ნაპოვნი 21 გარდაცვლილი პირიდან 19 პირი იდენტიფიცრებულია. კომენტარს საზოგადოებრივი მაუწყებელი ავრცელებს.

“ამ დროისთვის არსებული მონაცემებით, 21 მოქალაქე არის გარდაცვლილი და ნაპოვნი, აქედან 19 იდენტიფიცირებულია, 12 მოქალაქის სამძებრო-სამაშველო სამუშაოები აქტიურ რეჟიმში მიმდინარეობს. ჩართულია ყველა უწყება, სამინისტრო, 100-ზე მეტი ერთეული მძიმე ტექნიკა, სპეცტექნიკა, მობილიზებულია თავდაცვის სამინისტროს შესაბამისი ძალები, სამაშველო სამსახური. 24-საათიან რეჟიმში მიმდინარეობს სამძებრო სამუშაოები”.- ამბობს ხიდეშელი.

მერის თქმით, სამძებრო სამუშაოები რამდენიმე ლოკაციაზე მიმდინარეობს  და პრიორიტეტულად ის ლოკაციები მიიჩნეს, სადაც შესაძლებელი იყო მოქალაქეები ეპოვნათ.

“პრიორიტეტული ლოკაციები არის პირველ ეტაპზე შერჩეული, სადაც შესაძლებელი იყო, მოქალაქეები ყოფილიყვნენ. მათ შორის არის ეგრეთ წოდებული მინერალური წყლის, კალცის წყლის მიმდებარე ტერიტორია, სადაც რეგიონული განვითარებისა და ინფრასტრუქტურის სამინისტროს შესაბამისმა წარმომადგენლებმა გზა გაჭრეს. მიმდინარეობს მძიმე ტექნიკის გადაადგილება და სამძებრო სამუშაოები იმ მიმართულებით, სადაც კოტეჯები იყო განლაგებული. ასევე სამძებრო სამუშაოები მიმდინარეობს მდინარე ჭანჭახის ხეობაში, სადაც ბოლოს ერთ-ერთი მოქალაქე იპოვეს

ამ მასშტაბის სტიქიას ჩვენს ქვეყანაში, ჩვენს მუნიციპალიტეტში არავინ ელოდა, ყველასთვის მოულოდნელი იყო. ეს მდინარე შეტანილი არ არის ღვარცოფულ მდინარეთა შორის და, სამწუხაროდ, სტიქიის პირველივე დღიდან გარკვეული პირების მიერ ამ თემებზე სპეკულირება ხდება. მინდა, მათ მოვუწოდო, სპეკულაციებს თავი დაანებონ, მთავარია, გვერდით დავუდგეთ მოქალაქეებს, რომელთა ოჯახის წევრებიც დაღუპულები არიან”.- თქვა ონის მერმა.

ამ დროისთვის, შოვში მომხდარი ტრაგედიის შედეგად დაღუპულთა რაოდენობა 21-ია, 12 ადამიანი კი სტიქიის ზონაში კვლავ იძებნება.

რაჭაში, შოვში მეწყერის შედეგად მიწის მასა 3 აგვისტოს, დაახლოებით, 16:00 საათზე ჩამოიშალა.

შინაგან საქმეთა სამინისტრომ გამოძიება სისხლის სამართლის კოდექსის 240-ე – სამთო, სამშენებლო ან სხვა სამუშაოების წარმოებისას უსაფრთხოების წესების დარღვევისა და 116-ე – სიცოცხლის გაუფრთხილებლობით მოსპობის მუხლებით დაიწყო.