შვედეთის ელჩი გურიის რეგიონს სტუმრობდა

შვედეთის ელჩი ულრიკ თიდესტრომი ჩოხატაურსა და ოზურგეთში გამართულ გარემოსდაცვით საგანმანათლებლო ღონისძიებას – „ბიობლიცს“ დაესწრო.

ღონისძიებას ადგილობრივმა არასამთავრობო ორგანიზაციებმა, ბუნების დაცვის მსოფლიო ფონდთან (WWF) ერთად, შვედეთის საელჩოს ინიციატივითა და ფინანსური დახმარებით უმასპინძლეს.

„ბიობლიცში“, რომლის მთავარი თემა გურიის ბიომრავალფეროვნება იყო, მონაწილეობა ადგილობრივი სკოლების მოსწავლეებმა მიიღეს. ჩოხატაურში პირველი ადგილი ნაბეღლავის საჯარო სკოლამ მოიპოვა, მეორე–მესამე ადგილებზე კი, ქვაბღის და ჩხაკაურას სასკოლო გუნდები გავიდნენ. ოზურგეთში ჩატარებულ კონკურსში კი პირველი ადგილის მფლობელი მთისპირის სასკოლო გუნდი გახდა. ლიხაურის და ცხემლისხიდის საჯარო სკოლებმა კი მეორე–მესამე ადგილები გაინაწილეს. გამარჯვბულ გუნდებს შვედეთის ელჩმა, ულრიკ თიდესტრომმა და ბუნების დაცვის მსოფლიო ფონდის (WWF) დირექტორმა გიორგი სანადირაძემ ჯილდოები გადასცეს. ჯილდოები, ასევე, მიიღეს პედაგოგებმა.

ღონისძიება გურიის ეროვნული პარკის დაარსების პროექტის ფარგლებში ჩატარდა და მისი ერთ-ერთი მთავარი მიზანია პროგრამის შესახებ ადგილობრივი ახალგაზრდების ცნობიერების ამაღლება და მომავალში მათი ჩართულობის გაზრდა.

პროექტს “გურიის ეროვნული პარკის დაარსება” ახორციელებს ბუნების დაცვის მსოფლიო ფონდი(WWF), საქართველოს გარემოს დაცვისა და სოფლის მეურნეობის სამინისტროსთან და დაცული ტერიტორიების სააგენტოსთან მჭიდრო თანამშრომლობით და შვედეთის მთავრობის ფინანსური მხარდაჭერით.