დღეს ხმაური და სიტყვიერი დაპირისპირება მოჰყვა ოზურგეთის მუნიციპალიტეტის მერის კონსტანტინე შარაშენიძის საქმიანობის ერთი წლის ანგარიშის ჩაბარებას.
ერთიანი ნაციონალური მოძრაობის წევრებმა დავით მჟავანაძემ და ბესო ქათამაძემ მერი კორუფციულ გარიგებებში დაადანაშაულეს.
მჟავანაძემ სხდომაზე ოზურგეთის მერის მიერ შევსებული დეკლარაციების ასლები წარმოადგინა და განაცხადა, რომ მერის და მისი ოჯახის შესყიდვები მნიშვნელოვნად აღემატება დეკლარაციაში მითითებულ შემოსავლებს. მჟავანაძის თქმით, დეკლარაცია ვერ პასუხობს კითხვას, როგორ შეიძინა მერის შვილმა 150 000 ლარად ღირებული ბინა. მისივე განცხადებით, იგივე პრობლემები გამოიკვეთა ბევრი სხვა ხარჯის შემთხვევაშიც.
”რომ იცოდეთ, ბაბუაჩემი მწვანილის საყიდლად მოსკოვში დადიოდა” – ასე უპასუხა მერმა ოპოზიციის ბრალდებებს.
ბესო ქათამაძემ კონსტანტინე შარაშენიძე მუნიციპალური ტექნიკის პირადი მიზნებით გაქირავებაში, პანდემიის დროს კანონდარღვევით წარმოებულ ტენდერებში, უხარისხოდ შესრულებულ სამუშაოებში და კრიმინალურ გარჩევებში დაადანაშაულა.
“ოზურგეთს ჰყავს კორუმპირებული მერი. ამბობს, რომ თითქოს დამოუკიდებლად არჩეულია, მაგრამ ეს ტყუილია. ბოდიში მინდა მოვუხადო საზოგადოებას, რომ სამწუხაროდ მის გამარჯვებაში ლომის წილი ნაციონალურმა მოძრაობამ შეიტანა. “- განაცხადა ბესო ქათამაძემ.
ბრალდებებს ხმაური და მერის მხრიდან საპასუხო არაკორექტული გამონათქვამები მოჰყვა. ”თმენის ვალდებულება მაქვს თორენ, ორივე კაი დასათქეშები ხართ” – ასე მიმართა მერმა ოპოზიციას.
”ასეთი ნაგავი მერი ჰყავს ოზურგეთს” – ასეთი იყო დავით მჟავანაძის პასუხი.
ნაციონალური მოძრაობის წევრები აპირებენ ოზურგეთის მერის წინააღმდეგ პროკურატურას მიმართონ.
ოზურგეთის მერმა მედიასთან ბრალდებებზე ვრცელი კომენტარი არ გააკეთა.
“ნაციონალურ მოძრაობას საკუთარი ხედვები აქვს, რაც ჩემთვის პრიორიტეტული არ არის. მადლობა ყველას, ვინც ჩემი ანგარიშის მოსმენაზე მოვიდა და პანდემიის მიუხედავად დრო დამითმო.”- განაცხადა კონსტანტინე შარაშენიძემ.
კომენტარები
Loading ...
