საქართველოს მესამე პრეზიდენტს სტრასბურგის სასამართლოს გადაწყვეტილებას ადვოკატები დღეს დეტალურად გააცნობენ. სავარაუდოდ, სწორედ ამის შემდეგ გახდება ცნობილი, რა გადაწყვეტილებას მიიღებს მიხეილ სააკაშვილი შიმშილობის შეწყვეტასთან დაკავშირებით.
დღესვე დაგეგმილია კონსულტაცია სახელმწიფო ინსპექტორის სამსახურის მიერ ჩატარებულ საგამოძიებო ღონისძიებაზეც, რომლითაც უნდა დადგინდეს, იძალადა თუ არა საბადრაგო სამსახურმა მესამე პრეიზდენტზე გლდანის ციხის საავადმყოფოში გადაყვანის შემდეგ.
უფლებადამცველები მიხეილ სააკაშვილთან გუშინდელ სასამართლო პროცესზეც ისაუბრებენ, რომელიც ბრალდებულის გარეშე ჩატარდა.
“ვისაუბრებთ საქალაქო სასამართლოში ჩავლილ პროცესზე, თუ შეიძლება ამას პროცესი ვუწოდოთ, ვისაუბრებთ ასევე ადამიანის უფლებათა ევროპული სასამართლოს გადაწყვეტილებაზე და ყველა მიმდინარე საკითხებზე. ამავდროულად, მისი ჯანმრთელობის შესახებ მივიღებთ ინფორმაციას. გუშინ იყვნენ სახელმწიფო ინსპექტორის წარმომადგენლები შესული, გვიანობამდე მუშაობდნენ იმ დანაშაულებრივ ფაქტებთან დაკავშირებით, რაც მიხეილ სააკაშვილის წინააღმდეგ განხორციელდა ბოლო დღეებში განმავლობაში”, – თქვა ადვოკატმა ბექა ბასილაიამ.
ცნობისთვის, ადამიანის უფლებათა ევროპულმა სასამართლომ, მიხეილ სააკაშვილის დაცვის მხარის მოთხოვნა დროებითი ღონისძიების მიღების შესახებ დააკმაყოფილა და საქმეს პრიორიტეტი მიანიჭა. სტრასბურგი ახლა მხარეებისგან დამატებით ინფორმაციას ითხოვს, რის შემდეგაც საკითხზე კიდევ ერთხელ, 24 ნოემბერს იმსჯელებს და გადაწყვეტს, უნდა მოხდეს თუ არა სააკაშვილის სხვა კლინიკაში გადაყვანა. მანამდე კი ევროსასამართლო ავალებს მთავრობას, მიაწოდოს ინფორმაცია სააკაშვილის ჯანმრთელობაზე და ციხის საავადმყოფოში გაწეულ სამედიცინო პროცედურებზე; შეახსენებს, რომ სწორედ ხელისუფლებამ უნდა უზრუნველყოს ციხეში მისი უსაფრთხოება და სათანადო სამედიცინო მზრუნველობა, იმ შემთხვევაშიც, თუ ის შიმშილობას შეწყვეტს.
www.mtavari.tv
Loading ...
