რა ხარვეზები გამოვლინდა 26 ოქტომბრის არჩევნებზე ცესკოს მონაცემებში, კერძოდ, ამომრჩევლის აქტივობასთან დაკავშირებით. ამასთან დაკავშირებით სამართლიანმა არჩევნებმა ბრიფინგი გამართა. როგორც ბრიფინგზე ორგანიზაციის უფროსმა მკვლევარმა შოთა ნარსიამ განაცხადა, ამომრჩევლის აქტივობასთან დაკავშირებით, ცესკოსგან სპეციალური უბნების მონაცემები ისევ არ მიუღიათ. შოთა ნარსიამ ცესკოს მონაცემებში არაბუნებრივი მახასიათებლებზე ისაუბრა.
“ცესკომ 8 ნოემბერს გაკეთებული განცხადებით, 11 საარჩევნო უბანზე რეგისტრირებულზე მეტი კაცი ამომრჩევლის მიერ ხმის მიცემა საუბნო-საარჩევნო კომისიებიდან მიღებული არაზუსტი მონაცემებით ახსნა. თუმცა საარჩევნო ადმინისტრაციას არ წარმოუდგენია მოცემულ საარჩევნო უბნებზე ამომრჩეველთა აქტივობის დაზუსტებული მონაცემები გენდერულ ჭრილში. შესაბამისად გაურკვეველია, როგორ ნაწილდება კენჭისყრაში მონაწილე კაცი/ქალი ამომრჩევლების რაოდენობა.
ცესკოს განცხადება რომ კაცი/ქალი ამომრჩევლების მონაცემებში ცვლილება მხოლოდ 11 საარჩევნო უბნის 150 ამომრჩეველს შეეხო, წარმოადგენს არასწორ ინფორმაციას. ამას ადასტურებს ცესკოს გვერდზე 26 ოქტომბერს გამოქვეყნებულ აქტივობის მონაცემებში არსებული აუხსნელი ცვლილებები. მაგალითად 73 საარჩევნო ოლქიდან 57-ში დაფიქსირდა კაცი ამომრჩევლების, ხოლო 2-ში კი ქალი ამომრჩევლების კლება, რაც შეიძლება აიხსნას მხოლოდ, მათში შეცდომის არსებობით, ან მონაცემების მანიპულაციით.
საერთო ჯამში კენჭისყრის შემდეგ ცესკოს მონაცემებში დაფიქსირდა არჩევნებში მონაწილე კაცი ამომრჩევლების რაოდენობის კლება 88 975-ით ქალი ამომრჩევლების ზრდა 91911. საყურადღებოა რომ 10 საარჩევნო ოლქში შეუსაბამობა გამოვლინდა არჩევნებში მონაწილე ადამიანების საერთო მონაცემებშიც. მარნეულის საარჩევნო ოლქში ცესკოს ინფორმაციით,გამოცხადებული იყო 41 766 ამომრჩეველი, ბოლოს მიღებული მონაცემები კი აჩვენებს 43858 ამომრჩეველს. ცესკოს არ განუმარტავს რამ გამოიწვია მსგავსი არალოგიკური ცვლილებები.
თუკი ცესკო გამორიცხავს მონაცემების შეგროვებისას შეცდომის დაშვებას, ნორმალური განაწილებიდან კაცი ან ქალი ამომრჩევლის გადახრა შესაძლოა კენჭისყრის პროცესში არსებულ მანიპულაციებზე მიუთითებდეს,” – განაცხადა შოთა ნარსიამ.
Loading ...
