შესაძლოა ქვეყანაში ახალი შეზღუდვები დაწესდეს – რა რეგულაციებზე მსჯელობს მთავრობა

ჯანდაცვის სამინისტრო საკოორდინაციო საბჭოს შეზღუდვების გამკაცრების რეკომენდაციით მიმართავს. შესაძლოა, დაწესდეს ახალი შეზღუდვებიც. ეკატერინე ტიკარაძის თქმით, ამის მიზეზი კორონავირუსის შემთხვევების გავრცელების “ოდნავი” მატებაა. რუსთავი ორის ეთერში ჯანდაცვის მინისტრმა აღნიშნა, რომ ჯერჯერობით, უწყება მსჯელობს და ნაადრევი იქნება თქმა, რა შეზღუდვები გამკაცრდება ან დაემატება.

“ჯერ არ არსებობს ის სრული პაკეტი, რომელიც საკოორდინაციო საბჭოს წარედგინება, თუმცა დამატებითი ღონისძიებების გატარების აუცილებლობის საფუძველს გვაძლევს ინფექციის გავრცელების კოეფიციენტის შეჩერება და ოდნავი მატება, რაც გულისხმობს იმას, რომ შემდგომი სამი კვირისთვის შეიძლება ვივარაუდოთ ინფექციის აბსოლუტურ რიცხვში და დადებითობის მაჩვენებლის გაზრდა. იმისთვის, რომ ეს თავიდან ავიცილოთ, მნიშვნელოვანია, განხილული იყოს სხვადასხვა ღონისძიება, რომელიც ეფექტური იქნება და განაპირობებს ინფექციის კლებას და  არა ზრდას” – თქვა ტიკარაძემ.

კითხვაზე, “ანუ ჯანდაცვის გუნდს ექნება რეკომენდაციები შეზღუდვების უფრო გამკაცრებასთან ან ახალ შეზღუდვებთან დაკავშირებით?”, მინისტრი პასუხობს – “დიახ, გამკაცრებასთან დაკავშირებით აუცილებლად, ახალ რეგულაციებზე ვმსჯელობთ”.

ქვეყანაში აკრძალულია კონცერტები, ფესტივალები და დიდი თავყრილობები. სავალდებულოა პირბადის ტარება როგორც დახურულ, ისე ღია სივრცეში. 25 აგვისტოდან კვების ობიექტებს მუშაობის უფლება მხოლოდ 22:00-მდე აქვთ. 14 აგვისტოს გაჩერებული საზოგადოებრივი ტრანსპორტი კი, მხოლოდ 13 სექტემბრიდან აღდგა. 15 სექტემბრიდან ქვეყანაში სწავლა დისტანციურად დაიწყო.