განათლების მინისტრის გივი მიქანაძის თქმით, ეროვნული გამოცდების გადახედვა ან სხვა გამოცდებით ჩანაცვლება დღის წესრიგში არ დგას. ამის შესახებ მან საქართველოს პირველი არხის ეთერში განაცხადა.
მისი თქმით, ეროვნული გამოცდების მიმართ არის საზოგადოების მაღალი სანდოობა.
„შესაბამისად, ამ ეტაპზე საკითხი, რომ ეროვნული გამოცდები გადაიხედება და რამე სხვა გამოცდები ჩაანაცვლებს, დღის წესრიგშიც კი არ დგას. ჩვენ ჩვეულებრივად ვაგრძელებთ იმ სისტემით ახალგაზრდების ცოდნის გამომჟღავნების შესაძლებლობის მიცემას, რასაც ეროვნული გამოცდები იძლევა. წლევანდელმა წელმაც დაადასტურა, რომ საკმაოდ მაღალი სტანდარტით ჩატარდა ეროვნული გამოცდები“, – განაცხადა მიქანაძემ.
აღსანიშნავია, რომ უმაღლესში ჩარიცხვის სისტემის შესაძლო ცვლილების შესახებ საუბარი წლებია მიმდინარეობდა. გასულ წელს, განათლების ყოფილმა მინისტრმა გიორგი ამილახვარმა განაცხადა, რომ ეროვნული გამოცდების ახალი სისტემის დანერგვა 2027 წლის ზაფხულიდან იგეგმებოდა. თუმცა, როგორც ჩანს, მთავრობამ ახალი დაანონსებული რეფორმის ფარგლებში ეროვნული გამოცდების სისტემის ცვლილება გადაიფიქრა.
სამთავრობო პროგრამის შესრულების მიმდინარეობის შესახებ წლევანდელ მოხსენებაშია აღნიშნული იყო, რომ შემუშავებული იყო უმაღლეს საგანმანათლებლო დაწესებულებაში ჩარიცხვის ახალი სისტემის კონცეფცია, რომელიც ითვალისწინებს ჩარიცხვის მრავალკომპონენტიანი სისტემის შექმნას და მოიცავს მე-12 კლასის გამოცდებს შერჩეულ საგნებში (ცოდნისა და კოგნიტური უნარების შეფასება), აბიტურიენტის საშუალო საფეხურის საშუალო ქულებსა (GPA) და დამატებით კრიტერიუმს, რომელსაც უმაღლესი საგანმანათლებლო დაწესებულება განსაზღვრავს.
ასევე, დოკუმენტში ეწერა, რომ საშუალო საფეხურის პოლიტიკის განვითარების ფარგლებში, ზოგადი და უმაღლესი განათლების საფეხურებს შორის კავშირის გასაძლიერებლად, მსოფლიო ბანკის მიმდინარე ადამიანური კაპიტალის პროგრამის ფარგლებში, მუშავდებოდა უმაღლეს საგანმანათლებლო დაწესებულებებში ტრანზიციის ახალი მოდელი.
Loading ...