თქვენ შეიძლება გქონდეთ ერთი, ძალიან ჩვეულებივი ჰიგიენური ჩვევა, რომელიც საშიშია – ყურის ჩხირების პერმანენტული გამოყენება.
ეს ძალიან ჩვეულებრივი ბამბიანი ჩხირები, ყველგან გვხვდება – მაღაზიებსა თუ აფთიაქში და რთული დასაჯერებელია, როგორი კატასტროფული ზიანის მიყენება შეუძლია თქვენი ყურისა და სმენისთვის.
ყურის ჩხირები ძალიან ბევრ რამეში კომფორტულად გამოიყენება, თუმცა რაოდენ გასაკვირიც არ უნდა იყოს, ყურის საწმენდად – არა. ზოგიერთ მათგანს ყუთზეც აწერია რომ “არ გამოიყენება ყურებისთვის”.
ალბათ, სხვებისგანაც ხშირად გაგიგიათ, რომ მისი მოხმარება არ შეიძლება. თუ რატომ ამას “ფორტუნასთან” ყელ-ყურ ცხვირის სნეულებათა ეროვნული ცენტრის დირექტორი, პროფესორი შოთა ჯაფარიძე განმარტავს.
მისი თქმით, ყურის ჩხირებმა შეიძლება გამოიწვიოს დაფის აპკის დაზიანება, მილის კანის დათხელება, სოკოვანი ინფექციები და სხვა გართულებები.
ექიმი ყვება, რომ მის კლინიკაში არაერთი პაციენტი მოხვედრილა სწორედ ამ ჩხირების ხშირი მოხმარების გამო. ბოლოს ჰყავდა პაციენტი, რომელსაც ყურის ჩხირების ხშირი გამოყენების გამო, კანი იმდენად ჰქონდა დათხელებული, რომ ოპერაცია საგრძნობლად გართულდა.
“სამწუხაროდ, საქართველოში გახშირებულია გარეთა სასმენი მილის და დაფის აპკის დაზიანება ე.წ. ყურის ჩხირების გამოყენებით.
ახლახანს მქონდა შემთხვევა, რომ პაციენტს დასჭირდა ოტოსკლეროზის ოპერაცია. ოპერაციის დროს გამოჩნდა, რომ მას კანი ჰქონდა საოცრად დათხელებული. კანის დათხელებამ კი სერიოზული პრობლემები შექმნა”, – აცხადებს შოთა ჯაფარიძე.
ექიმი მოუწოდებს ყველას, განსაკუთრებით კი მშობლებს, მოერიდონ ყურის ჩხირების გამოყენებას.
“მშობლები ბავშვებს აბაზანის მოღების შემდეგ ყოველთვის, როგორც წესი, ყურის საწმენდი ჩხირებით უწმენდენ გარეთა სასმელ მილს, რაც არასწორია.
გარდა ამისა, ბავშვები თვითონ იყენებენ ყურის ჩხირებს და ამ შემთხვევაში კიდევ უფრო ხშირია დაფის აპკის დაზიანება.
ხშირი წმენდით, ბავშვი იქნება თუ ზრდასრული ადამიანი, აზიანებს გარეთა სასმენი მილის კანს და დროთა განმავლობაში, კანი თამბაქოს ქაღალდივით თხელი ხდება. ეს ართულებს საჭიროების დროს ქირურგიულ ჩარევას და პრობლემას უქმნის ქირურგს რეკონსტრუქციული ოპერაციების დროს”, – აცხადებს “ფორტუნასთან” ინტერვიუში შოთა ჯაფარიძე.
რაც შეეხება ჰიგიენურ პროცედურებს და ყურის შეშრობას, სპეციალისტები გვარწმუნებენ, რომ ჯანმრთელ ყურში, სადაც დაფის აპკი მთელია, წყლის მოხვედრა საშიში საერთოდ არ არის. თუ ყურში ბანაობისას/ცურვისას წყალი ჩავიდა, თავის გადაწევა სრულიად საკმარისია. წყალი ამ დროს უკან გადმოვა. ის ნაწილი კი, რაც შიგნით დარჩება თავისით ამოშრება.
Loading ...
