„ყველის ობი სასარგებლოა, პურისა და მურაბის კი – ჯანმრთელობისთვის საზიანო“ – ირაკლი არაბული

„პირველ რიგში, აუცილებელია, მაქსიმალურად ჯანსაღი პროდუქტი შევინახოთ, რადგან ის ოდნავადაც რომ იყოს დაზიანებული, ეს უკვე იმის ნიშანია, რომ ეს ნაწილი დანარჩენი ნაწილების დაზიანებასა და ლპობას გამოიწვევს. ასევე მნიშვნელოვანია, შენახვის რომელ მეთოდს ვიყენებთ“, – ამის შესახებ, „რადიო პალიტრას“ გადაცემაში „თქვენი დრო“, სურსათის უვნებლობის სპეციალისტმა, ირაკლი არაბულმა, განაცხადა.

არაბული საუბრობს იმ დეტალებზე, რომელთა მიხედვითაც ზამთრისთვის შესანახი პროდუქტები უნდა მოვამზადოთ.

„მნიშვნელოვანია, ზამთრისთვის პროდუქტის შენახვის რომელ მეთოდს გამოვიყენებთ: კონსერვირებას, კომპოტისა თუ მურაბის სახით, გაყინვას, ჩირის მომზადებას და ა.შ. აუცილებლად უნდა გავითვალისწინოთ ობის ფაქტორიც – არსებობს კარგი ობის სოკოები, როგორც ეს ყველის შემთხვევაშია და მას მიირთმევენ კიდეც, მაგრამ მურაბასა და პურზე გაჩენილი სოკოები ჯანმრთელობისთვის საზიანოა.

ასევე, ცხადია, სერიოზული პრობლემაა ე.წ. შეღებილი ან ხელოვნურად სახეცვლილი ვიზუალის მქონე ხილი. ამ საფრთხის თავიდან ასარიდებლად ასე უნდა მოვიქცეთ: ნაყიდი ხილი ცხელ წყალში მოვათავსოთ და თუკი ფერს გაუშვებს, ესე იგი, საქმე ხელოვნურად სახეცვლილ ვიზუალთან გვაქვს და ეს ჯანმრთელობისთვის საზიანო იქნებოდა. ამიტომ, ამ დეტალსაც ყურადღება უნდა მივაქციოთ.

ასე რომ, რეკომენდაციების მოსმენა, პროცესებში უკეთესად გაცნობიერება და მათი პრაქტიკაში გადატანა დაგვეხმარება იმაში, რომ ზამთარში გემრიელად და, რაც მთავარია, უსაფრთხოდ ვიკვებოთ“, – განაცხადა არაბულმა.

www.bpn.ge