ღაზის საავადმყოფოდან ევაკუირებული ჩვილების მდგომარეობა კრიტიკულია

ღაზის სექტორის ჩრდილოეთში მდებარე საავადმყოფო ალ-შიფიდან სამხრეთში, რაფაჰის საავადმყოფოში ევაკუირებული 31 ჩვილიდან 11-ის მდგომარეობა კრიტიკულია. ამის შესახებ ჯანდაცვის მსოფლიო ორგანიზაცია(WHO) იუწყება. ევაკუაცია 19 ნოემბერს უზრუნველყვეს ამ ორგანიზაციის და „წითელი ნახევარმთვარის საზოგადოების“ წარმომადგენლებმა.

ალ-შიფიდან ევაკუირებული ჩვილები რაფაჰში, არაბთა გაერთიანებული საამიროების მიერ აღჭურვილ ჰოსპიტალში იმყოფებიან. ჯანდაცვის მსოფლიო ორგანიზაცია საავადმყოფოს ექიმებისგან მიღებულ ინფორმაციაზე დაყრდნობით წერს, რომ ყველა ახალშობილი ებრძვის სერიოზულ ინფექციებს, რომელთა გაწვავება ალ-შიფაში შესაბამისი მედიკამენტების არარსებობამ გამოიწვია.

ჯანდაცვის მსოფლიო ორგანიზაციის მონაცემებით, ალ-შიფაში რჩება 250-ზე მეტი პაციენტი და 20 მედიკოსი, რომელთა ევაკუაციისთვის მუშაობა გრძელდება. WHO კიდევ ერთხელ მოუწოდებს საერთაშორისო თანამეგობრობას, კოლექტიური ძალისხმევა გამოიყენოს ღაზის სექტორში საბრძოლო მოქმედებების დაუყოვნებლივ შეწყვეტისა და ჰუმანიტარული კატასტროფის დასასრულებლად.

ისრაელის თავდაცვის ძალების სამხედროებმა ღაზის უდიდესი საავადმყოფოს, ალ-შიფის ტერიტორიაზე ოპერაცია 15 ნოემბერს დაიწყეს დაზვერვის მონაცემების საფუძველზე, რომ საავადმყოფოს ქვეშ „ჰამასის“ სამეთაურო ცენტრი მდებარეობს. ამ ობიექტის არსებობა დაადასტურა ამერიკულმა დაზვერვამაც.