ქუთაისელი ჟურნალისტები აჭარის ტელევიზიის ჟურნალისტებს სოლიდარობას უცხადებენ

7 დეკემბერს, ქუთაისში, მედიასაშუალებების წარმომადგენლებმა აჭარის საზოგადოებრივი მაუწყებლის ჟურნალისტებისადმი სოლიდარობის აქცია გამართეს.

„აჭარის საზოგადოებრივი მაუწყებელში განვითარებული მოვლენების გამო, სოლიდარობას ვუცხადებთ კოლეგებს, რადგან მათი ბოლო დროს გაკეთებული განცხადებების მიხედვით, სიტყვის თავისუფლებას საფრთხე ემუქრება არჩეული დირექტორის მხრიდან, რომელიც ხელისუფლების დავალებებს ასრულებს“, – განაცხადეს აქციის მონაწილეებმა და მაუწყებლის დირექტორს, გიორგი კოხრეიძეს მოუწოდეს, არ ჩაერიოს სარედაქციო პოლიტიკაში.

„აჭარის მაუწყებელში განვითარებული მოვლენები, საფრთხეს უქმნის თავისუფალ მედიას და ჩვენ ვერ დავუშვებთ, ხელისუფლების ჩარევას მაუწყებლის საქმიანობაში, რადგან ეს შეიძლება აღვიქვათ სიტყვის თავისუფლების წინააღმდეგ მიმართული მოვლენების დასაწყისად, რაც მიუღებელია“, – ამბობს ჟურნალისტი ხვიჩა ვაშაყმაძე.

საზოგადოებრივი მაუწყებლის აჭარის ტელევიზიისა და რადიოს ახალ დირექტორს გიორგი კოხრეიძეს მაუწყებლის ჟურნალისტები ადანაშაულებენ სარედაქციო პოლიტიკაში ჩარევის მცდელობაში, დაუსაბუთებელ ბრალდებებსა და შანტაჟში.

www.radiotavisupleba.ge