ქობულეთში მდინარე აჭყვა კალაპოტიდან გადმოვიდა- დატბორილია ქალაქის ნაწილი

ქობულეთში უხვი ნალექის შედეგად გამოწვეული ზიანის სალიკვიდაციო სამუშაოები დილიდან აქტიურად მიმდინარეობს.

ძლიერი წვიმის შედეგად მდინარე აჭყვა კალაპოტიდან გადმოვიდა, რამაც ქალაქში რამდენიმე მისამართზე დატბორვა გამოიწვია.

მერიის შესაბამისი სამსახურები, სხვადასხვა უწყებებთან ერთად აქტიურ რეჟიმში ახორციელებენ ამოტუმბვით და გაწმენდით სამუშაოებს.

სხვადასხვა სოფელში განვითარდა მეწყრული პროცესები. შემთხვევის ადგილებზე იმყოფება ქობულეთის მერი, საგანგებო სიტუაციების მართვის სამსახურის, მერიის და საგზაო დეპარტამენტის წარმომადგენლები.

„წვიმის შედეგად მდინარე აჭვა გადმოვიდა კალაპოტიდან და დაიტბორა ბაზრის მიმდებარე ტერიტორია. მუშაობის შესაბამისი კომისია დაითვლის ზარალს და რა თქმა უნდა ჩვენს ხალხს დავუდგებით გვერდით, ზარალი იქნება სრულად ანაზღაურებული.

სხვადასხვა ლოკაციაზე ასევე ჩამოწვა მეწყერი. მიმდინარეობს გაწმენდითი სამუშაოები. ძირითადი მიმართულებები, გზები თითქმის აღდგენილი არის.

ვინც საშიშ ზონაში არის, გადაყვანილი იქნებიან უსაფრთხო ადგილას. ადგილზე გეოლოგებიც იყვნენ მისული, შესაბამისი დასკვნის შედეგად მივიღებთ გადაწყვეტილებებს,“ – აცხადებს ქობულეთის მუნიციპალიტეტის მერი ლევან ზოიძე.