ქობულეთში ინერტული მასალის მიმღებ-გადამამუშავებელ საწარმოში დასაქმებული 55 წლის მამაკაცი სამუშაოს წარმოების დროს გარდაიცვალა. როგორც ცნობილი გახდა, მამაკაცი ოზურგეთის მცხოვრები იყო და აღნიშნულ საწარმოში ერთ წელზე მეტი ხნის მანძილზე მუშაობდა. როგორც შპს “თეთროსანის” დირექტორი როლანდ ლაზიშვილი ამბობს, დასაქმებული მძიმე ტექნიკას მართავდა, იგი მწყობრიდან გამოვიდა, შეკეთებას თავად შეეცადა, თუმცა ტექნიკა მოულოდნელად დაგორდა და მამაკაცი მოიყოლა. მისივე თქმით, ობიექტზე უსაფრთხოების ნომრები დაცული იყო. საწარმო ამჟამად დახურულია, სამუშაოები კი გაურკვეველი ვადით შეჩერებულია. ადგილზე იმყოფებიან სამართალდამცველები და კრიმინალისტები, ასევე შრომითი ინსპექციის წარმომადგენლები. არსებული ინფორმაციით, უკვე გამოიკითხა კომპანიის წარმომადგენლები და საწარმოში დასაქმებული პირები. ასევე, ამოღებულია სათვალთვალო კამერების ჩანაწერები. შინაგან საქმეთა სამინისტროს ინფორმაციით, მომხდართან დაკავშირებით გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.
ინფორმაციას მომხდარის შესახებ აჭარის საზოგადოებრივი მაუწყებელი ავრცელებს.
Loading ...