ქობულეთში, თავისუფლების ქუჩაზე, არსებული ინერტული მასალის მიმღებ-გადამამუშავებელ საწარმოში დასაქმებული 55 წლის მამაკაცი სამუშაოს წარმოების დროს გარდაიცვალა.
როგორც შპს “თეთროსანის” დირექტორი როლანდ ლაზიშვილი ამბობს, დასაქმებული მძიმე ტექნიკას მართავდა, იგი მწყობრიდან გამოვიდა, შეკეთებას თავად შეეცადა, თუმცა ტექნიკა მოულოდნელად დაგორდა და მამაკაცი მოიყოლა.
მისივე თქმით, ობიექტზე უსაფრთხოების ნომრები დაცული იყო. საწარმო ამჟამად დახურულია, სამუშაოები კი გაურკვეველი ვადით შეჩერებულია.
ადგილზე იმყოფებიან სამართალდამცველები და კრიმინალისტები, ასევე შრომითი ინსპექციის წარმომადგენლები.
არსებული ინფორმაციით, უკვე გამოიკითხა კომპანიის წარმომადგენლები და საწარმოში დასაქმებული პირები. ასევე, ამოღებულია სათვალთვალო კამერების ჩანაწერები.
მომხდარს შინაგან საქმეთა სამინისტროში ადასტურებენ და განმარტავენ, რომ მომხდარზე გამოძიება მიმდინარეობს.
წყარო: ajaratv.ge
Loading ...