”ქართული ოცნების” ინიციატივით, საერთაშორისო დამკვირვებელი შეიძლება მხოლოდ უცხო ქვეყნის მოქალაქე იყოს

პლენარულ ხდომაზე I მოსმენით მხარი დაუჭირეს ოცნების მიერ საარჩევნო კანონმდებლობაში ახალ ცვლილებებს, რომლებიც საარჩევნო კომისიის სხდომაზე ფოტოვიდეოგადაღებისა და აუდიო-მონიტორინგის წესს და საერთაშორისო საარჩევნო დამკვირვებლებს ეხება.

ცვლილებების მიხედვით, საარჩევნო კომისიის სხდომაზე ფოტოვიდეოგადაღება და აუდიო-მონიტორინგი ცესკოს დადგენილებით დარეგულირდება.

“პირველი არის ის, რომ ცენტრალური საარჩევნო კომისიის სხდომებზე ვიდეო-ფოტო გადაღება და აუდიო ჩაწერა მოხდება ცენტრალური საარჩევნო კომისიის მიერ დადგენილი წესის მიხედვით, აქამდე მოქმედებდა საერთო წესი. მოგეხსენებათ, რომ საარჩევნო ხმის მიცემის უფლების განხორციელებისას აუდიო ჩაწერა დაუშვებელია, რადგან შეიძლება გამოიწვიოს პერსონალური მონაცემების გამჟღავნება. ამიტომ, იქნა მიღებული გადაწყვეტილება, რომ მოხდეს ცალკე წესით სხდომებზე ვიდეო-ფოტო გადაღების და აუდიო ჩანაწერის დადგენა და განსაზღვრა”. – თქვა მათიკაშვილმა.

ამასთან ერთად, ოცნების ინიცირებული ცვლილებებით, არჩენვებზე საერთაშორისო დამკვირვებელი შეიძლება იყოს მხოლოდ 18 წელს მიღწეული უცხო ქვეყნის მოქალაქე. ასევე განისაზღვრება საერთაშორისო დამკვირვებლების თანმხლები თარჯიმნის რეგისტრაციის პროცედურებიც.

“მეორე საკითხი ეხება საერთაშორისო დამკვირვებლებს. მოგეხსენებათ, საარჩევნო კოდექსის 44 მუხლის მეოთხე პუნქტით, განსაზღვრულია, რომ ადგილობრივი დამკვირვებელი შეიძლება იყოს საქართველოს მოქალაქე, რომელმაც მიაღწია 18 წელს. ხოლო ცვლილების შესაბამისად, საერთაშორისო დამკვირვებლისთვის, ის წარმოდგენილი უნდა იყოს იმ პირით, რომელიც არ იქნება საქართველოს მოქალაქე და იქნება 18 წელს მიღწეული. აქაც სტანდარტი საერთაშორისო იყოს დაცული. ნებისმიერი საფუძველი იმის, რომ საერთაშორისო სადამკვირვებლო მისიასთან მიწოდებული ინფორმაცია, დასკვნები იყოს თავისუფალი ყოველგვარი პოლიტიკური გემოვნებისას, ის ცდუნება, რაც საქართველოს მოქალაქეს შეიძლება გააჩნდეს, ვცდილობთ, იყოს რეგულირებული და დასკვნებშიც, რომლებსაც საერთაშორისო დამკვირვებლები ასახავენ, იყოს იმ პირის მიერ წარდგენილი ინფორმაციით, რომელიც თავისუფალია ყოველგვარი პოლიტიკური მიკერძოებისგან – იმ თვალსაზრისით, რომ ის არ წარმოადგენს ამ ქვეყნის მოქალაქეს.

მესამე საკითხი ეხება თარჯიმნებს. იმ თვალსაზრისით, რომ თუკი არ ეცოდინება ქართული ენა კონკრეტულ დამკვირვებელს, ბუნებრივია, ისინი სარგებლობენ თარჯიმნის დახმარებით. და ამ თარჯიმნის რეგისტრაცია როგორ ხდება – 2 დღით ადრე უნდა მიმართოს საარჩევნო კომისიას და ა.შ. ამას არეგულირებს ეს ცვლილებები”. – თქვა კირცხალიამ.

ოცნების მიერ ინიცირებული ცვლილებებით, საპარლამენტო არჩევნებზე საქართველოს მოქალაქეები საზღვარგარეთ ვეღარ შეძლებენ ხმის მიცემას. ადგილობრივი თვითმმართველობის არჩევნების მსგავსად, მოქალაქე ხმის მისაცემად საქართველოში უნდა ჩამოვიდეს.