"ქართული ოცნებიდან" "ევროპულ საქართველოში" – წინასაარჩევნო ციებ-ცხელება დაიწყო

წინასაარჩევნო ციებ_ცხელება დაიწყო. დღეს დილით, ცნობილი გახდა, რომ ბათუმის საკრებულოს წევრი თემურ კახიძე, “ევროპულ საქართველოს” რიგებში გაწევრიანდა. ქართული ოცნების ყოფილი წევრი, რომელიც ადრე თავისუფალი დემოკრატების წევრი იყო, დღეს გიგი უგულავამ და ოთარ კახიძემ წარადგინეს. “ჩვენ გუნდს შემოუერთდა ბათუმის საკრებულოს წევრი მმართველი პარტიიდან თემურ კახიძე, მას შემდეგ რაც ამის შესახებ მმართველ პარტიაში გუშინ შეფუცხუნდნენ, აამოქმედეს ყველა მექანიზმი, მაგრამ ვერაფერს გახდნენ, რადგან გადაწყვეტილება კახიძეს პრინციპების მიხედვით მიიღო. ქართულმა ოცნებამ ვეღარაფერი მოახერხა და დაასწრო განცხადების გავრცელება, რომ იგი პარტიიდან გარიცხეს”-განაცხადა გიგი უგულავამ ” მე ვერ ვხედავ ვერანაირ რესურსს იმ პარტიაში სადაც ვიყავი, რომ ქვეყანა გამოგვეყვანა კრიზიდიდან. წავედი იმიტომ, რომ ეს არის პროფესიონალების გუნდი, რომელსაც აქვს ზუსტი ხედვა, როგორ გამოიყვანონ კრიზისიდან. მე ასევე ვტოვებ თანამდებობას, ვიყავი საკრებულოში იურიდიული კომისიის თავმჯდომარე”-განაცხადა თემურ კახიძემ. ჟურნალისტების კითხვაზე, რატომ არასდროს წასულა იგი მმართველი პარტიის წინააღმდეგ და აქამდე რატომ ემხრობოდა ყველა გადაწყვეტილებას, რომელიც საკრებულოში მიიღებოდა სამოქალაქო საზოგადოების პროტესტის ფონზე, კახიძე პასუხობს, რომ ის იყო პასიურ მდგომარეობაში და ეს მეტყველებდა იმაზე, რომ ბევრ რამეში არ ეთანხმებოდა მმართველ გუნდს. აღსანიშანვია, რომ ბრიფინგის დაწყებამდე რამდენიმე წუთით ადრე განცხადება გაავრცელეს “ქართულ ოცნებაში” და თქვეს, რომ კახიძე პარტიიდან გარიცხულია. ქართული ოცნებიდან ბათუმის საკრებულოს დეპუტატი ნატალია ზოიძე აცხადებს, რომ კახიძე მმართველი გუნდიდან ოპოზიციასთან გარიგებებში შესვლის გამო გარიცხეს.