ქართველი ხალხი კონგრესმენების განცხადებების გარეშეც კარგად ხვდება ვითარების სიმწვავეს – გია ჟორჟოლიანი

„ქართული ოცნება“ არ იყო მოწოდებული და ვერ მოახერხა ქვეყანა წაეყვანა განვითარების გზით. ეს იყო საპროტესტო მოძრაობა და საპროტესტო მოძრაობადვე დარჩა“,- ამის შესახებ სოციალ-დემოკრატიული პარტიის წევრმა, გია ჟორჟოლიანმა განაცხადა.

მისი თქმით, ქართველი ხალხი კონგრესმენების განცხადებების გარეშეც ხვდება, რომ მდგომარეობა ქვეყანაში მძიმეა.

„ქართულმა ოცნებამ“ თავისი მისია ამოწურა და უნდა დათმოს ხელისუფლება. ბოლო ხანს, დასავლელი პოლიტიკოსების მხრიდან მოწოდებები, რომ „ქართულმა ოცნებამ“ გააუმჯობესოს ვითარება ფუჭია, რადგან ქართველი ხალხი განცხადებების გარეშეც კარგად ხვდება არსებული ვითარების სიმწვავეს და გრძნობს პოლიტიკური ელიტის უუნარობას, გამოასწოროს სიტუაცია.

2012 წელს საქართველოს ისტორიაში მოხდა მნიშვნელოვანი მოვლენა – დამარცხდა რეპრესიული და ავტორიტარული „ნაციონალური მოძრაობის“ რეჟიმი. ამ მოვლენაში „ქართული ოცნების“ და ბიძინა ივანიშვილის დიდი დამსახურებაა, მაგრამ ამით ოცნებამ თავისი მისია ამოწურა. დღეს, ხელისუფლებაში მოსვლიდან 8 წლის შემდეგაც, ამ პარტიის ლეგიტიმაცია ისევ „ნაციონალური მოძრაობის“ წინააღმდეგ პროტესტზე დგას.

ჩვენ მივიჩნევთ, რომ დღეს ოცნების მისიაა, არ ჩაებღაუჭოს ხელისუფლებას და არ შეუშალოს ხელი ახალ კონსტრუქციულ ჯანსაღ პოლიტიკურ ინიციატივებს და ჯგუფებს, რომლებსაც სურთ შეცვალონ 30-წლიანი მანკიერი წესრიგი ,რომელიც უკიდურესად აზარალებს მოსახლეობას. არა ნაცმოძრაობას უკვე საკმარისი აღარ არის. ხალხმა 2020 არჩევნებზე უარი უნდა უთხრას როგორც „ნაციონალურ მოძრაობას“, ისე „ქართულ ოცნებას“,- განაცხადა გია ჟორჟოლიანმა.

www.primetime.ge