ფრანკფურტის აეროპორტში კლიმატის აქტივისტების აქციის გამო ასზე მეტი ფრენა გაუქმდა

ფრანკფურტის აეროპორტში კლიმატის აქტივისტების საპროტესტო აქციის გამო დროებით ფრენები შეჩერდა.

ადგილობრივი მედიის ცნობით, დემონსტრანტების ნაწილმა ბარიერების გარღვევა მოახერხა და ასაფრენ ბილიკებთან იყვნენ შეკრებილები. აქტივისტების ცნობით, ასაფრენ ბილიკზე აქციის ექვსი მონაწილე შეიჭრა, ბანერებით “ნავთი კლავს”.

დემონსტრანტების მთავარი მოთხოვნა, გერმანიის მთავრობის მიერ გლობალური შეთანხმების ჩამოყალიბება და ხელმოწერაა, რაც 2030 წლისთვის ნავთობის, გაზისა და ქვანახშირის მოხმარების ეტაპობრივად შეზღუდვას ითვალისწინებს.

აეროპორტის მიერ გავრცელებულ განცხადებაში აღნიშნულია, რომ აქციის გამო დაგეგმილი 1 400 ფრენიდან 140 გაუქმდა, თუმცა, ამ დროისთვის ბილიკი თავისუფალია და ფრენები აღდგენილია. მიუხედავად ამისა, აეროპორტი მგზავრებს კვლავ მოუწოდებს აეროპორტში მისვლამდე ფრენის სტატუსის შემოწმებისკენ.