ოზურგეთის მუნიციპალიტეტის საკრებულოს სხდომა ტრადიციული ხმაურით და ფიზიკური დაპირისპირებით დაიწყო. მას შემდეგ რაც, ნაციონალური მოძრაობის წევრებმა სხდომაზე აქციების დროს დაშავებული ადამიანების ფოტოები მიიტანეს და სურათების ოზურგეთის მერისთვის გადაცემა დააპირეს, ამის საშუალება მათ ოზურგეთის ვიცე-მერმა და ქართული ოცნების დეპუტატებმა არ მისცეს. ხმაური მალევე გადაიზარდა ფიზიკურ გაწევ-გამოწევასა და დაპირისპირებაში. ჩოჩქოლის და მრავალმხრივი ფიზიკური დაპირისპირების დროს მსუბუქი დაზიანება მიიღო საკრებულოს პრესსამსახურის თანამშრომელმა. ძალადობა იყო მედიის მიმართაც. ქართული ოცნების დეპუტატმა ნუგზარ სარჯველაძემ ”რუსთავი 2” – ის ოპერატორს ირაკლი ღლონტს ფიზიკური შეურაცხყოფა მიაყენა, ასევე მცირედი დაზიანება მიიღო ”ტვ პირველის” ოპერატორმაც.
ადგილზე იმყოფებოდნენ სამართალდამცველებიც. საბოლოოდ ნაციონალური მოძრაობის დეპუტატებმა დარბაზი დატოვეს.
უფრო ადრე, სხდომის დაწყებამდე კი ადგილზე ოპოზიციონერ დეპუტატებს სირცხვილის კორიდორი ჰქონდათ მოწყობილი, შესასვლელ კართან, საიდანაც ქართული ოცნების დეპუტატები სხდომაზე შედიოდნენ, ოპოზიციონერები აქციაზე დაშავებული ადამიანების ფოტოებით იდგნენ. ხმაური და სიტყვიერი დაპირისპირება იყო ტერიტორიაზეც.
Loading ...