„ფერმერებმა საბედნიეროდ თხილის მოვლა ისწავლეს, თუმცა ცოტა არიან, ვინც ხარისხიან მოსავალს აწარმოებს“ – “ჯეო-ნათსი”

„ფერმერებმა საბედნიეროდ თხილის მოვლა ისწავლეს, თუმცა ცოტა არიან, ვინც ხარისხიან მოსავალს აწარმოებს“ – ამის შესახებ BM.GE-სთან “ჯეო-ნათსი” დირექტორმა, ჯენერ ბელქანიამ ისაუბრა.

მისი თქმით, ყოველწლიურად თხილის მოსავალი იზრდება და იმედი აქვთ, რომ 2025 წელს კიდევ უფრო მაღალი ხარისხის მოსავალს მიიღებენ.

“ფერმერებმა საბედნიეროდ თხილის მოვლა ისწავლეს, თუმცა იმ ფერმერების რაოდენობა, რომლებიც ხარისხიან ბევრ თხილს აწარმოებენ ცოტა არიან. ყოველ წელს, თხილის მოსავლის რაოდენობა იზრდება და იმედია წელსაც უკეთესი მოსავალი იქნება.

ძალიან მნიშვნელოვანია თხილის სუბსიდია. 2023 წელს, ფერმერებმა სუბსიდია რომ მიიღეს, არამიზნობრივად გამოიყენეს. თუმცა, 2024 წელს, სუბსიდიის მიღება უკვე გამკაცრებული იყო, ამიტომ ყველამ მიზნობრივად გამოიყენა. იმიტომ, რომ ფერმერს შემოსავალი ძალიან ცოტა აქვს, რადგან მოსავალს ფაროსანა უფუჭებს. ამრიგად, მას არ შეუძლია შეწამვლა თავისი ხარჯებით უზრუნველყოს, რაშიც სახელმწიფო ეხმარება. სუბსიდია და გეგმურად შესრულებული შესაწამლი თუ სხვა სამუშაოები ფერმერის მოსავლის ხარისხზე და რაოდენობაზე მნიშვნელოვნად აისახება, რადგან პროდუქტს პარაზიტი ნაკლებად გააფუჭებს და ფერმერიც უფრო მეტ შემოსავალს მიიღებს”, – ამბობს “ჯეო-ნათსის” დირექტორი.

ინფორმაციისთვის, თხილის წარმოების ხელშეწყობის სახელმწიფო პროგრამა 2025 წელსაც გაგრძელდება და ბიუჯეტიდან მეთხილე ფერმერების სუბსიდირებისთვის 23 მილიონი ლარი გამოიყო მაშინ, როდესაც 2024 წელს მეთხილე ფერმერების ხელშეწყობისთვის 21.5 მილიონი ლარი, პროგრამის ამოქმედების პირველ – 2023 წელს კი 21 მილიონი ლარი დაიხარჯა.