უცნობი სანტას სიურპრიზი კვირიკეთის საჯარო სკოლაში

რამდენიმე დღის წინ ოზურგეთის მუნიციპალიტეტის სოფელ კვირიკეთის საჯარო სკოლის თანამშრომლები და მოსწავლეები უჩვეულო სიურპრიზმა გაახარა.

სკოლაში ყველა პედაგოგისა და მოსწავლისთვის საახალწლო პაკეტი მიიტანეს, რომელიც სხვადასხვა სახეობის ტკბილეულს მოიცავდა.  საჩუქრები სკოლის ადმინისტრაციისა და ყველა კლასის მოსწავლისთვის, სულ 75-ზე მეტი ადამიანისთვის იყო განკუთვნილი.

საახალწლო სიურპრიზის ავტორმა ვინაობის გამხელა არ ისურვა. თუმცა ჩვენი ინფორმაციით, ის ახალგაზრდა ქალია, რომელსაც კვირიკეთის საჯარო სკოლა აქვს დამთავრებული და ამჟამად ემიგრაციაში იმყოფება.

საჩუქრებმა სკოლაში დიდი სიხარული და სასიამოვნო განწყობა შეიტანა. აღნიშნულ ფაქტთან დაკავშირებით სკოლამ ფეისბუქის გვერდზეც დაწერა:

“ჩვენს სკოლაში წელს უჩვეულოდ საიდუმლო სანტა ძალიან შორი გზიდან მოვიდა და თითოეულ ჩვენთაგანს, ის სითბო და სიყვარული უწილადა, რაც მას სამშობლოდან მოშორებით მცხოვრებს აკლია.
მადლობა ჩვენს სანტას,რომელიც ემიგრაციაში იმყოფება და ზრუნავს სხვების სიხარულზე.გისურვებთ სამშობლოში მალე დაბრუნებას და ბედნიერ და სასიამოვნო სიურპრიზებით სავსე ცხოვრებას . ბედნიერების ,
სიხარულის,ჯანმრთელობის და წარმატებების მომტანი იყოს თქვენთვის ეს ახალი წელი. ?
P.S. ის მართლაც საიდუმლოა და ქველმოქმედია,მისი არც სახელი ვიცით და არც ქვეყანა სადაც ამჟამად ცხოვრობს.” – წერს სკოლის ადმინისტრაცია.

მასალა მომზადებულია პროექტის “ჩვენ ვირჩევთ, ჩვენ ვაკონტროლებთ” ფარგლებში.

Funded through the Alumni Grants Program, U.S. Embassy in Georgia/დაფინანსებულია საქართველოში აშშ–ის საელჩოს ალუმნი საგრანტო პროგრამის ფარგლებში.