„უცებ 40-დან 20 გრადუსამდე შეიძლება დავარდეს ტემპერატურა – ძალიან საშიშია და ნიადაგის გამოფიტვასა და ეროზიას იწვევს“

„ძალიან მკვეთრი ცვლილებებია და უცებ 40 გრადუსიდან 20 გრადუსამდე შეიძლება დავარდეს ტემპერატურა – წელს დავაფიქსირეთ, რომ ღამისა და დღის ტემპერატურის ამპლიტუდა ძალიან დიდი იყო, რაც ძალიან საშიშია და ნიადაგის გამოფიტვასა და ეროზიას იწვევს“, – ამის შესახებ „საქართველოს მწვანეთა მოძრაობა / დედამიწის მეგობრები“ თავმჯდომარემ, ნინო ჩხობაძემ, „რადიო პალიტრას“ გადაცემაში „თქვენი დრო“ განაცხადა.

ჩხობაძემ ყურადღება გაამახვილა იმაზეც, რომ ამინდის გრძელვადიანი პროგნოზის გაკეთება ურთულესი გახდა, რადგან ატმოსფეროში უამრავი და ძალიან სწრაფი ცვლილებებია.

„რამდენიმე დღის წინ შეხვედრა გვქონდა და სანაპიროს კლიმატის ვარიაციებზე ვისაუბრეთ. აღმოჩნდა, რომ კლიმატის ცვლილების გამო, წვიმების მოცულობა არ გაზრდილა, მაგრამ ერთჯერადი მოსვლაა ძალიან დიდი – ერთ ჯერზე მოდის იმდენი, რაც შეიძლება თვეში მოდიოდეს და ქალაქების დატბორვის პრობლემის წინაშე ვდგებით. კარგად გვახსოვს, წელს ბათუმი რამდენჯერ დაიტბორა, ასევე ფოთი და სხვა ქალაქები, რამდენიმე დღის წინ დიდი დიღმის ამბებიც გვქონდა.

ამასთან ერთად, იმდენად არაპროგნოზირებადია კლიმატი და იმდენი ცვლილება ხდება ატმოსფეროში, რომ გრძელვადიანი პროგნოზების გაკეთება ძალიან რთულია. ძალიან მკვეთრი ცვლილებებია და უცებ 40 გრადუსიდან 20 გრადუსამდე შეიძლება დავარდეს ტემპერატურა – წელს დავაფიქსირეთ, რომ ღამისა და დღის ტემპერატურის ამპლიტუდა ძალიან დიდი იყო, რაც ძალიან საშიშია და ნიადაგის გამოფიტვასა და ეროზიას იწვევს. შესაბამისად, ნებისმიერი წვიმის დროს არსებობს საფრთხე, რომ ღვარცოფული პროცესები განვითარდეს. მით უმეტეს, რომ ჩვენთან ყველა მდინარე მთის მდინარეა და წვიმის წყლებით საზრდოობს.

ასე რომ, ამ ყველაფერზე მეტი უნდა ვისაუბროთ, მოვნახოთ გამოსავალი და გადავდგათ ნაბიჯები. სხვა შემთხვევაში, საქმე ბუნებასთან გვაქვს და რამდენადაც არაფერს გავაკეთებთ, იმდენად მკვეთრი პასუხი იქნება მისგან“, – განაცხადა ჩხობაძემ.

www.bpn.ge