უფასო სასადილოს ბენეფიციარები ოზურგეთის მერთან შეხვედრას ითხოვენ

ამ წუთებში ოზურგეთის მუნიციპალიტეტის მერიასთან უპოვართა სასადილოს ბენეფიციარები არიან შეკრებილები. როგორც ისინი აცხადებენ, აქვთ ინფორმაცია, რომ მერია მათთვის სერვისის მიმწოდებელი ინდმეწარმის ტენდერის წესით ჩანაცვლებას გეგმავს, რასაც ბენეფიციარები აპროტესტებენ. როგორც თავად ამბობენ, იმ დარბაზში, სადაც ამჟამად საკვებს იღებენ, პირობებით კმაყოფილები არიან და მისი შეცვლა არ სურთ. სოციალურად დაუცველების ინფორმაციით, უფასო სასადილოს გადაბარებას რესტორანი “თამარიონი” აპირებს. მოთხოვნების შესრულების მიზნით სოციალურად დაუცველები მერს განცხადებით მიმართავენ, რომელსაც 60 ადამიანი აწერს ხელს. ბენეფიციარების მეორე მოთხოვნა კვების თანხის გაზრდას უკავშირდება. როგორც ისინი ამბობენ,1,80 ლარი, რომელიც მათი კვებისთვის არის გამოყოფილი, საკმარისი არ არის და მის გაზრდას ითხოვენ.