“უსაფრთხო ელექტრო სიგარეტი არ არსებობს, მოზარდებში მათი გამოყენება კატეგორიულად მიუღებელია” – ივანე ჩხაიძე ელექტროსიგარეტის მავნებლობაზე

პედიატრი, თსსუ პროფესორი ივანე ჩხაიძე გადაცემაში“პირადი ექიმი” საუბრობს, რა საფრთხეს უქმნის ადამიანებს, განსაკუთრებით კი ბავშვებს, ელექტრო სიგარეტის მოხმარება:

– როდესაც თამბაქოს ინდუსტრიამ ჩანაცვლების გადაწყვეტილება მიიღო, პირველი ინფორმაცია, რაც ვრცელდებოდა, სიგარეტის მოწევის უსაფრთხო ალტერნატივის შექმნა იყო და ადამიანებს მოუწოდებდნენ, თუ გინდათ, სიგარეტის მოწევას თავი დაანებოთ, ელექტრო სიგარეტზე გადადითო. თუმცა, ეს არც უსაფრთხო ალტერნატივაა და არც თამბაქოსათვის თავის დანებების საშუალება. ორივე სლოგანი, რაც მოწყობილობების პრომოციას თან ახლდა, თავიდანვე არასწორი იყო. საზოგადოება შეგნებულად შეჰყავთ შეცდომაში. ნიკოტინი არსად გამქრალა. თუ სიგარეტში ნიკოტინი მთავარი საფრთხე იყო და ელექტრო სიგარეტშიცაა, მაშინ, რატომ არის ის უსაფრთხო?

თამბაქოს კანონი, რომელიც საქართველოში რამდენიმე წლის წინ მიიღეს, ძალიან ეფექტური აღმოჩნდა. მწეველობის პროცენტი 3 ერთეულითაა შემცირებული, რაც ძალიან მაღალი მაჩვენებელია. თუმცა, ახლა უფრო მეტი საფრთხე ელექტრო სიგარეტისა და გახურებადი თამბაქოს გამოყენებიდან მოდის, რადგან მათი მავნე ზეგავლენა ჯანმრთელობაზე უკვე დადგენილია. ეს ფაქტებზე დამყარებული შეფასებაა და უკვე ბევრი კვლევა არსებობს. უსაფრთხო ელექტრო სიგარეტი არ არსებობს. მასში შემავალი ძალიან ბევრი კომპონენტი ფილტვის დაზიანებას იწვევს. აქ საუბარია იმ ხანგრძლივ ზემოქმედებაზე, რასაც ყოველდღიური მოხმარება იწვევს. ზემოქმედების საბოლოო შედეგი ფილტვის ჯანმრთელობის მკვეთრი, ხშირად კი შეუქცევადი ცვლილებაა. მოსახლეობამ უნდა იცოდეს, რომ ეს მოწყობილობები უსაფრთხო ალტერნატივად არ უნდა განიხილებოდეს.

ბავშვებში მათი გამოყენება კატეგორიულად მიუღებელია. მათ ფილტვებს ელექტრო სიგარეტი გაცილებით მეტად აზიანებს. თუ სხვადასხვა პუბლიკაციას, ქრონოლოგიურად შევხედავთ, თავიდან ყველგან იყო აღნიშნული, რომ გლიცერინი უსაფრთხოა და ადამიანის ჯანმრთელობაზე არანაირი ზეგავლენა არ აქვს. თუმცა, ბოლო 2 წლის განმავლობაში უკვე რამდენიმე კვლევა გამოქვეყნდა, სადაც ნაჩვენებია, რომ ამ სახით გლიცერინის მოხმარება, სრულებითაც არ გახლავთ უსაფრთხო. ნაჩვენებია, რომ ის ფილტვების ანთებით ცვლილებებს იწვევს. როცა გლიცერინს დასალევად, საკვებად, კოსმეტიკურ საშუალებებში ვიყენებთ, ჯანმრთელობაზე არანაირი ზეგავლენა არ აქვს, მაგრამ თუ ის ადამიანის ორგანიზმში აეროზოლის სახით აღწევს, ის უკვე ფილტვების დაზიანებას იწვევს. – განაცხადა მან გადაცემაში.