გურია ტურისტული პოტენციალით ერთ-ერთი გამორჩეული რეგიონია, თუმცა, მისი დიდი ნაწილი აუთვისებელია. ერთ-ერთ ასეთ ადგილად თავისუფლად შეიძლება ჩოხატაურის მუნიციპალიტეტში, სოფელ ზემო სურების ტერიტორიაზე, ვანისა და ადიგენის მუნიციპალიტეტების საზღვრებთან მდებარე ჯაჯის ტბა დავასახელოთ.
მესხეთის ქედის სამხრეთ კალთაზე მდებარე ტბა, თოვლის, წვიმის და მიწისქვეშა წყლით საზრდოობს, ზღვის დონიდან 2655 მეტრ სიმაღლეზე მდებარეობს.
მისი სარკის ფართობი 0,01 კმ²-ია, მაქსიმალური სიღრმე 5 მ. ხოლო აუზის ფართობი 0,89 კმ²-ია.
წყალი მტკნარი, სუფთა და გამჭვირვალეა. გაუდინარია.
როგორც უკვე აღვნიშნეთ, ტბასთან მისვლა ჩოხატაურის მუნიციპალიტეტის სოფელ სურებიდანაა შესაძლებელი. თუმცა, არის სხვა მარშუტრებიც _ როგორც georgiantravelguide.com წერს, ჯაჯის ტბის მონახულება შეგიძლიათ აბასთუმნის, ფერსათის პლატოს და სოფელ დარცელის საშუალებითაც.
“ყველაზე გრძელი გზა აბასთუმნის ობსერვატორიიდან იწყება. მარშრუტი დაწყება აბასთუმნისდან მოსახერხებალია მცირე ჯგუფებისათვის რადგან, აბასთუმნის ობსერვატორიაში მარტივია საზოგადოებრივი ტრანსპორტით მოხვედრა.
ბილიკი ქედს მიუყვება და მოგზაურებს თვალწარმტაც ხედებს სთავაზობს ორივე მხარეს”, _ წერს ტურისტული ვებგვერდი, სადაც სიტყვაც არ არის ნათქვამი იმის შესახებ, რომ ტბამდე მისვლა ჩოხატაურის მუნიციპალიტეტიდანაცაა შესაძლებელი.
სავარაუდოდ, ამის მიზეზი ისაა, რომ ამ ულამაზეს ადგილზე მისასვლელად ჩოხატაურიდან საკმაოდ ცუდი გზაა _ უფრო სწორად, გზა თითქმის არ არის და ამის გამო, ტურისტები სხვა მარშუტებს ირჩევენს, რის გამოც გურულები ხელისუფლებას საყვედურობენ:
_ უნიკალური ადგილებია. ტურისტებისთვის მიზიდველი, თუმცა, უყურადღებოდაა მიტოვებული. ჯაჯის ტბაზე ძალიან ბევრი ადამიანი დადის, მაგრამ არა სურების გავლით, რადგან გზა არ არის. მარშუტი აქედან რომ მოაწესრიგონ, ეს ჩვენს შემოსავალზეც აისახება, _ აღნიშნავენ სურებლები.
ისინი იმაზეც წუხან, რომ ამ ტბის შესახებ ბევრმა არ იცის. არადა, ადგილი მართლაც უნიკალურია, რასაც სპეციალურად “გურიაtv”-ისთვის ექსკლუზიურად გადაღებული კადრებიც ადასტურებს.
ჩოხატაურის მუნიციპალიტეტის მერი, ირაკლი კუჭავა ჩვენთან საუბრისას ამბობს, რომ ამ ეპატისთვის მუნიციპალიტეტს არ აქვს იმის საშუალება, რომ ჯაჯის ტბამდე საავტომობილო გზა მიიყვანოს.
“ეს არის ადგილი, რომელიც ორ მუნიციპალიტეტს ესაზღვრება. მართლაც ულამაზესი ადგილია, თუმცა საავტომობილო გზა იქ არასდროს ყოფილა. თუმცა, მაღალი გამავლობის ტრანსპორტით, ბოლომდე არა, მაგრამ ახლოს მისვლა შესაძლებელია. ტურისტულ მარშუტად ითვლება, თუმცა, ამ ეტაპისთვის, მუნიციპალიტეტს არ აქვს იმის რესურსი, რომ ჯაჯის ტბამდე მისასვლელი საავტომობილო გზა გავაკეთოთ,” _ აღნიშნა ჩვენთან საუბრისას კუჭავამ.
Loading ...