“უნივერსიტეტის გაერთიანების პროცესი ამ ფორმით უნდა შეწყდეს” – თსუ-ს წარმომადგენლობითი საბჭო

თბილისის სახელმწიფო უნივერსიტეტის სენატი სტუ-ს და თსუ-ს გაერთიანების ინიციატივას დაუსაბუთებლად მიიჩნევს და სამინისტროს მოუწოდებს, პროცესი შეწყვიტოს.

აღნიშნულის შესახებ გადაწყვეტილება 4 თებერვალს სენატის – უნივერსიტეტის წარმომადგენლობითი საბჭოს სხდომაზე დაამტკიცეს.

თსუ-ს მიერ გამოქვეყნებული ოქმის თანახმად, მიღებულ განცხადებაში წერია:

• უნივერსიტეტების „გაერთიანების ინიციატივა არ არის დასაბუთებული და ამდენად, მიზანშეწონილი“.
• „სენატი მოითხოვს, პროცესის აკადემიურ სივრცეში დაბრუნებას, დიალოგს, უნივერსიტეტის წარმომადგენელთა ჩართულობას საკითხის შესწავლისას და ავტონომიურობის პრინციპის პატივისცემით გადაწყვეტილების მიღებას“.
• „მიგვაჩნია, რომ ორი უნივერსიტეტის გაერთიანების პროცესი ამ ფორმით უნდა შეწყდეს და გაგრძელდეს მხარეებთან აქტიური კომუნიკაცია“.
• ორივე უნივერსიტეტის ავტონომიურობის პრინციპის დაცვით დაიწყოს ორი ისტორიული უნივერსიტეტის გაერთიანების საჭიროების საკითხზე არგუმენტირებული საზოგადოებრივი დისკუსია როგორც ამ უნივერსიტეტთა, აგრეთვე დაინტერესებულ სეგმენტთა მონაწილეობით. აუცილებელია, რომ ეს პროცესი წარიმართოს ფართო კონტექსტის (უმაღლესი და ზოგადი განათლება) გათვალისწინებით, აკადემიური და სასკოლო საზოგადოების, განათლების სპეციალისტების, მკვლევრებისა და სტუდენტების ჩართულობით.
• „დღემდე არცერთ ინსტიტუციას არ მიუღია კონკრეტული კვლევის შედეგები ან ნებისმიერი სხვა სახის დასაბუთება ამ ორი უნივერსიტეტის გაერთიანებით განათლების/კვლევის ხარისხის ამაღლების ან/და სხვა შესაძლო პოზიტიური გავლენის შესახებ“.

„გაერთიანება გამოიწვევს მმართველობით სირთულეებს საკმაოდ გრძელვადიან პირობებში, რაც პირდაპირ გავლენას მოახდენს განათლების ხარისხზე. გარდა ამისა, ორი უნივერსიტეტის გაერთიანება გარდაუვლად გამოიწვეს, როგორც აკადემიური, ასევე ადმინისტრაციული პერსონალის სამუშაოადგილების შემცირებას“, – მიიჩნევს სენატი.

ამავე დროს, ორივე უნივერსიტეტში კვლევის, სწავლებისა და სწავლის ხარისხის გაუმჯობესების მიზნით თსუ-ს წარმომადგენლობითი საბჭო სამინისტროს სთავაზობს:

1. უნივერსიტეტთა წარსულის, გამოცდილებისა და ტრადიციის გათვალისწინებით, შენარჩუნდეს ივანე ჯავახიშვილის სახელობის თბილისის სახელმწიფო უნივერსიტეტისა და საქართველოს ტექნიკური უნივერსიტეტის დამოუკიდებლობა;

2. გაიზარდოს სახელმწიფო უნივერსიტეტების ფაქტობრივი ავტონომიის ხარისხი და ამან ასახვა ჰპოვოს საკანონმდებლო დონეზე;

3. გაიზარდოს სახელმწიფო უნივერსიტეტების ფინანსური მხარდაჭერა, რათა მათ საშუალება მიეცეთ, დამოუკიდებლად შეძლონ სამეცნიერო-კვლევითი კომპონენტის, სწავლების ხარისხის, ინფრასტრუქტურის გაუმჯობესება და ღირსეულად გააგრძელონ ფუნქციონირება ეროვნულ, რეგიონულ და საერთაშორისო დონეზე.

შეგახსენებთ: 29 იანვარს ცნობილი გახდა, რომ უმაღლესი განათლების რეფორმის ფარგლებში თბილისის სახელმწიფო უნივერსიტეტი და საქართველოს ტექნიკური უნივერსიტეტი გაერთიანდებიან. ერთიან სასწავლებელს თსუ ერქმევა. 29 იანვრიდან პროფესორ-მასწავლებლების ნაწილმა და სტუდენტებმა საპროტესტო აქციები გამართეს. აკადემიურმა პერსონალმა და სტუდენტებმა გივი მიქანაძის ბრიფინგიდან გაიგეს დაგეგმილი ცვლილების შესახებ. განათლების ექსპერტების ნაწილი აცხადებს, რომ არ უნახავთ შრომის ბაზრის კვლევის ანგარიში რომლის საფუძველზეც განათლების სამინისტრო ორი სახელმწიფო უნივერსიტეტის გაერთიანების გადაწყვეტილებას ახსნიდა.