რუსეთის ფედერაციის საბჭომ მხარი დაუჭირა რუსეთის შემადგენლობაში უკრაინის 4 რეგიონის მიღების ე.წ. საერთაშორისო შეთანხმებების რატიფიცირებას. ერთი დღით ადრე, 3 ოქტომბერს, იგივე გააკეთა რუსეთის დუმამ.
პრეზიდენტმა პუტინმა უკრაინის დონეცკის, ლუგანსკის, ხერსონის და ზაპოროჟიეს ოლქების ანექსირების გადაწყვეტილება 30 სექტემბერს გამოაცხადა და ამ რეგიონების პრორუსული დე ფაქტო ადმინისტრაციების ხელმძღვანელებთან ხელი მოაწერა “შეთანხმებებს”, რომელთა ზოგადი ჩანაწერის მიხედვით, რუსეთის შემადგენლობაში შედიან დონეცკის და ლუგანსკის ე.წ. სახალხო რესპუბლიკები და ხერსონის და ზაპოროჟიეს ოლქები, რომელთა “ფარგლები განისაზღვრება მათი შექმნის და რუსეთის შემადგენლობაში მიღების დღეს არსებული საზღვრებით”.
კრემლში ვერ აკონკრეტებენ, რომელ საზღვრებში მოხდა უკრაინის ხერსონის და ზაპოროჟიეს ოლქების ანექსირება. პრეზიდენტ პუტინის პრესმდივანმა პესკოვმა 3 ოქტომბერს განაცხადა, რომ ამ საკითხზე გააგრძელებენ “რჩევების მიღებას” ოლქში მცხოვრები ადამიანებისგან. ჟურნალისტების შეკითხვას, რა ფორმით აპირებენ ამას, კრემლის პრესმდივანმა უპასუხა, რომ ამას ახლა ვერ იტყვის, თუმცა, „ნებისმიერ შემთხვევაში, ნებისმიერი კონფიგურაცია დამოკიდებული იქნება მხოლოდ ამა, თუ იმ ტერიტორიაზე მცხოვრები ხალხის ნებაზე“. რაც შეეხება დონეცკს და ლუგანსკს, პესკოვის პასუხის მიხედვით, უკრაინის ამ რეგიონების ანექსია მოხდა 2014 წლის საზღვრებში. კრემლის პრესმდივანმა არ უპასუხა შეკითხვას, ვის ეკუთვნის რუსეთის მიერ შეერთებული ოლქების ის ტერიტორიები, რომლებიც დღესაც უკრაინის არმიის კონტროლქვეშაა.
Loading ...